Satang katto katne snem baroh ki kam jong ka jylla yn sa pynïaid lut ki heh spah na shabar jylla

Sngew sangsot shi rukom, haba ki kontraktor trai shnong, ki kylla khar poiei hakhmat jong kane ka sorkar jylla, kaba la ïalam da kita ki seng kiba kam ïalade, ba ki dei ki seng trai ri trai jylla, lada dei ka NPP, UDP, HSPDP (lait noh ka BJP).
Kitei ki kontraktor trai shnong, ki ïa lynñiar ba ki duh kam, nangta ki ïa lynñiar ba kim ïoh bill bad kitei ki dei ki daw bah, kiba paw ha kine ki sngi, ïa kitei ki kontraktor trai shnong jong ka jylla.
Kane ka sobjek, ka dei kaba jylliew bha, namar ba ka sorkar MDA, ka pyntrei ïa ki skhim bapher, da kaba shim da ka ram, ha kaba ma ngi ki trai shnong, ngi hap siew ïa kitei ki ram, lyngba ki jingoh khajna bapher bapher, naduh ka bai sha, ka bai thied mar thied mata, bai petrol, bai kyiad bad kumta ter ter, katba ïa ki kam, ba la ïoh na kitei ki khajna jong ngi, ki wan trei da ki briew kiba nabar suda bad hangta keiñ ba u mih u dak jingkylli uba heh bha ïa ka bynta jong ka sorkar jylla bad ïa ka jingkit kaba khia kaba ktah ïa uwei pa uwei u trai shnong, uba hap ban bah ïa katei ka rai kaba da ki phew hajar klur, wat hadien ba kane ka sorkar jylla, ka lah ban nym don shuh ha ka bor synshar.
Kata ka dei ka mat, hynrei ha kajuh ka por, haba kine ki kontraktor trai shnong, kiba la dep ban pynlong ïa ka jingïalang paidbah jong ki, ki la dei ruh ban kylli ïa ki tnat sorkar India, kiba bun bah, kiba don ha Shillong, la ki ju ai kam ïano sha bad kitei ki kynthup ïa ka tnat MES jong ki shipai, ka NEEPCO, ka NEIGHRIMS, ka ICAR bad sa kiwei kiwei pat de kiba bun bah ki tnat bad lah ban pynkynmaw ba tang ka tnat shipai jong ka nongbah Shillong, ka don da ki bun spah tylli ki tender, hynrei kitei kim paw pyrthei shuh ha kine ki sngi bad katei ka lah ban long, ba kiba trei, ki dei tang kiba ïajan bad ki heh shipai.
Na ka bynta ka bit ka biang jong ki kontraktor trai shnong, ka donkam ba kin thaw da ka seng kaba khlaiñ bor na bynta ka Meghalaya hi baroh kawei, kumba long ki nonghikai, ki ASHA, ki Muster roll bad hangta kin kham dur ïap bha ruh sha ki Constituency jong ki Myntri sorkar, ban lap ïa ki jingshisha halor ki jingtrei bapher bapher, ki bym ju pynbna paidbah satia ha ki kotkhubor bad nalor kata, ki dei ban khynra naphang ïa ki tnat jong ka sorkar India, ba kin sngewthuh, la kitei ki spah tylli ki kam, ki leit sha ki trai shnong ne sha ki dalal jong ki mynder?
Shuh shuh lada ka iai long ha kane ka rukom nangne shakhmat ki ban mad ïa ki jingeh kin dei beit ki trai shnong bad ki kontractor kiba rit ba ria kiba dei hi na ka jylla ki ban duh nong namar kim ïoh shuh ïa ki kam kumba kidei ban ïoh naduh ki por kiba mynshwa ha ka por jong kiwei pat ki sorkar ha ki snem ba la leit noh.
Lah ban ong ba ka rukom treikam jong kane ka sorkar ka ïasynriem thik kum ka sorkar NDA ba la ïalam da ka seng BJP hapoh ka sorkar Pdeng, ha kaba ki rukom treikam ki ïasynriem beit thik ban pynlong kawei ïa baroh ki jait kam kontractor tang da kawei ka rukom pynïaid bad dei hangne lehse tang ki kontractor heh spah ne ki kompeni ba heh kiba nabar jylla ki ïoh ïa ki kam ki jam katba ki kontractor trai jylla kim ïoh shuh satia ïa ki kam ki jam kiba dei ban trei wat ha la ka jylla lajong.
Kumta lada ka ïaibteng ban ïai long kumne ki briew ki ban ïap thngan kin dei beit kiba na la jylla la jong bad lada ïa u khaw jong ki trai jylla ka sorkar MDA ka la ailad ïa ki bar jylla ban wan knieh noh sa tang katto katne snem baroh ki kam ki kam yn sa pynïaid lut da ki briew kiba nabar jylla bad kum ka nuksa kumba long mynta ka sorkar ka la shu thung bun tang kita ki consultant kiba nabar kiba trei ïa ki kam jong tang hadien ba la dep trei lypa da ki briew ne ki nongtrei Sorkar jong kane ka jylla, kaba lah ban long ba na ka liang kine ki consultant ki shu ai jingmynjur beit ne ai ki recommendation jong ki.
Kumta ki nongshong shnong bad ki paidbah na ki shnong bapher bapher kin hap ban kyndit bynriew noh ha shwa ba ka um kan poi haduh ryndang, ym kumba ong u Bah Prestone Tynsong ba ki pynbeit manla ka san snem bad ngop ruh manla ki san snem.
Lah ruh ban ong ba lada baroh ka spah ka phew ka kamai kajih bad baroh ki jingdon jingem jong ka jylla la ailad noh ba kin tuid shabar jylla ne sha kiwei pat ki jylla khlem pep ki khun samla kiba dang bun bah ki bym pat ïohkam ne kiba khlem kam khlem jam kin sa kylla long ki samla kiba shu shang makia bad ngop ruh ha kiba bun ki jingsniew kum ki jingdih pynbuaid, ki kam tuh kam thiem, kam lute bad kaba ma tam kadei ka jingdih bad kyrni ban ngop ha u drok u ban pynjot syndon ïa ka jingim bad ka longrynïeng jong ki ha ka imlang sahlang bad la ïing ka sem jong ki.