Nongstoiñ, Nailar, 06: Hadien ka jingud jingnam ki nongshong iew halor ka jingjakhlia ka iew Rambrai, na ka liang ka seng West Khasi Student’s Union Rambrai pyllun hapoh ka jingïalam u President ka seng samla Kyrmen Marweiñ ki la leit ban khmih hi dalade bad la lap ruh ïa ka jingjakhlia ka iew Rambrai.
Halor kane, na ka liang ka seng ka la leit ïakynduh ïa u Syiem Rambrai ban ïathir ha kaba ïa dei bad ka jingjakhlia ka iew. Na ka liang u Syiem u la pynpaw ka jingsngewkhia shisha ïa ka jingbret ïa ka jakhlia bad ong ruh ba ka Hima hi ka shem jingeh halor kane ka bynta haduh mynta.
U la ong ba ka Hima ka la wad katto katne ki jaka bret ñiut, hynrei ka shem jingeh bha namar kim pat ïoh ïa ka jaka ban kham pajih na ki shnong briew. Watla kata ruh u Syiem u la ong ba ka Hima hi kan ïai wad ïa ka jaka ba biang bha ban leit bret ïa ki ñiut, khnang ba kan nym ktah ïa ki paidbah ha ka liang ka koit ka khiah. Ka seng ka sngewhun ïa ka jingïai trei shitom u Syiem ryngkat ka Hima ba ki khlem shong kli kti wat la kim pat ïoh ïa ka jaka ba biang.
