Satah ki jaboh ha nala, dkut ki pipe um kylleng ka Nongrim Hills, jurip u CEM ka KHADC

Shillong, Nohprah, 21: Ka Dorbar Shnong Nongrim Hills ha ryngkat ka jingdon lang jong u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem, u MDC jong ka Malki-Laitumkhrah Constituency u Bah Fantin Joseph Lakadong, ki Chief Engineer jong ka tnat PHE Shillong Division bad ka PWD Central Division lem bad ki ophisar kynthup ruh ki Contractor ki la hiar jurip ïa ki surok bad ki pipe um ha ka bynta jong ka shnong Nongrim Hills.
Ha ka jingjurip la lap ba bun ki bynta jong ka surok kaba leit sha Mizo Modern Higher Secondary School ki la sniew bad haba ïaid kylleng ka shnong Nongrim Hills, ki nala ki long kiba jaboh bad kiba isaitmet ban peit katba ki pipe um ki mih haduh surok bad don ruh ki pipe um kiba la dkut noh tang shiteng.
U Rangbah Shnong jong ka shnong Nongrim Hills, u Bah Bantylli Nari u la ïathuh, hadien ka jingjurip la pynthikna ba u Chief Engineer jong ka tnat PWD Central Division un phah maramot noh ïa ka surok ha ka taiew ban sa wan ïa ki pipe um bad ïa ki nala.
Ka Dorbar Shnong ryngkat ka jingtreilang bad u CEM ka KHADC bad u MDC kin phah ïa ki Estimate bad ki jinglut jingsep sha u Myntri ka Sorkar Jylla uba khmih ïa ka tnad PHE ban phah tap noh ïa ki nala da ki nar bad ban phah maramot ïa ki pipe um khnang ba kan lait na kino kino ki jingjia hadien habud.
U Rangbah shnong u la ong ba ïa ka Nongrim Hills la tip ruh kum ka shnong kaba kiew sted bha bad donkam ïa ka jingtreilang bad ïa ki paidbah ban pynlong ïa ka shnong kawei kaba khuid bad kaba shngaiñ tam.