Shillong, Ïaïong 22: Ki rangïalehkai football ka Meghalaya kila la aiti lut ïalade met bad mynsiem hapdeng madan, hynrei kim shym la ïoh kheit ïa u soh ba thiang ha kaba kila mad noh ka nam rem da 4-3 hakhmat ka West Bengal kaba dei ruh ka lahduh barim ha ka lympung ïalehkai National Football Championship (Santosh Trophy) ha ka jingïakhun ha ka sngi Thohdieng ha Kottappadi Football Stadium, Kerala. Ha mar ba sdang ka jingïalehkai hadien ba ka West Bengal kala lamkhmat ha ka thep kol, ka Meghalaya kala ïoh ban pynphai kylliang hadien ba kala shah lamkhmat arsien, hynrei ha ka jingïakhun jong ka kylla miet ka Meghalaya kam shym la lah ban pynphai kylliang.
Ka WB kala lamkhmat nyngkong ha ka minit ïalehkai ba 23 ha ka jingïakhun jong ka Group A hynrei u Sangti Janai Shianglong u la lah ban pynshat ïa ka bol na ki rangïalehkai dien ka West Bengal bad ïoh ruh ban pynïakhaid na bynta ka Meghalaya ha ka minit ïalehkai ba 40. Pynban, ka kynhun kala shah lamkhmat biang ha ka jingïakhun shwa ban kut ka kylla miet na ka daw ka jingbakla pynur ïa u rangïalehkai hapoh ka area kol ha kaba ka West Bengal kala ïoh ka kabu kaba biang ban pynphai bad kala lamkhmat da 2-1 kol.
U Shano Tariang u la lah ban ïalehkai bha bad thep ïa ka kol pynïakhaid na bynta ka kynhun ha ka minit ba 46 hynrei tang hadien katto katne minit ka West Bengal kala ïoh ban pynphai kylla. Ka jingïakhun hapdeng kine ki ar tylli ki team ka la nang ïathnem bad jwat bha ha baroh arliang. U Shano Tariang sa shisien pat u la ïoh ban thep ïa ka shi kol ha ka minit ba 65 kaba la pynlong ïa ka jingïalehkai ban ïakhaid da 3-3 kol. Ka West Bengal kala ïoh ban pynphai biang ha ka minit ba 69. Ka Meghalaya kala mad noh ka nam rem hadien ba ka khlem lah ban pynrung ïa ka penalty ba kala ïoh ha ka minit 85 ba la shut da u kapten jong ka kynhun u Hardy Cliff Nongbri.
Da kaba khur saw point na ki laisien ïakhun, ka Meghalaya kan sa aireng pat khadduh ïa ka Punjab ha ka sngi U Blei ha ka por 8 baje mynmiet. Kumta ha katei ka jingïalehkai ka Meghalaya ka donkam ban jop khnang ba kan ïoh ban pyndep ha ka Top Two ban rung pat sha kawei ka kyrdan ïakhun.
