Shillong, Kyllalyngkot 25: Ka Meghalaya ka la ïoh ban lamkhmat lai sien ha ka jingïakhun pyrshah ïa ka Punjab ha ka Group B jong ka National Football Championship na ka bynta ka Santosh Trophy 2025-26 ha Dhakuakhana, Assam, hynrei ha kaba kut ka la hap ban ïasam mar shi poiñ hadien ba ka Punjab ka la ïohlad ban pynïakhaid baroh lai sien (3-3).
U Owanijuh Pajuh (35′), u Babysunday Marngar (69′) bad u Deibormame Tongper (78′) ki la pynkhihjar na ka bynta ka Meghalaya, katba u Jagdeep Singh (60′), u Himanshu Jangra (71′) bad u Harmanpreet Singh (81′) ki la thep ïa ki kol ban pynïakhaid na ka bynta kane ka lahduh barim, ka Punjab.
Hadien ar tylli ki jingïalehkai, ka Meghalaya ka shong ha ka kyrdan ba-ar ha ka Group, da kaba ïa ryngkat 4 point bad ka Kerala. Tang ki saw tylli ki kynhun kiba wan hakhmat duh kin ïohrung sha ka Quarterfinal.
U Coach bah Khlain Pyrkhat Syiemlieh u la wanrah tang kawei ka jingkylla ïa ka kynhun ba sdang kaba la jop pyrshah ïa ka Odisha ar sngi mynshwa, da kaba wanrah ïa u Owanijuh ha ka jaka jong u Fairming Suting.
U Owanijuh u la buh hakhmat ïa ka Meghalaya ha ka kylla step da kaba shim ïa ka rai ban khyrwit mardor khlem ka jingartatien ïa ka bol hapoh phyllaw kol kaba la ïarap pynrung da u Mebankhraw Wahlang.
Kumba shi kynta thik ba ka Meghalaya ka la lamkhmat ïa ka jingïalehkai, u Jagdeep u la pynïakhaid noh na ka bynta ka Punjab.
Wat hadien ba ka por ka la ïaid 60 minit hynrei kane ka jingïalehkai ka la wanrah sa saw tylli ki kol kiba sah bad u Babysunday u dei uba nyngkong ban thep kawei na pdeng kine. U Deibormame u la pashat ïa ka bol kaba thikna na ka liang kamon bad u Babysunday, uba la pynkhihjar ha ka jingjop pyrshah ïa ka Odisha, u la rynsied ban pyndei tiak da ka khlieh ïa ka bol shapoh kol ban pynlong ïa ka Meghalaya ban lamkhmat ha ka sien kaba ar da 2-1 kol.
Pynban ka Punjab, kawei na ki saw tylli ki kynhun ha ka Group B kaba la ju rah ïa ka Santosh Trophy mynshwa, ka la ïai bteng ban pynbor ïalade ban tur shakhmat, bad ka la shimpor tang ar minit ba ka kynhun kan jubab da kaba pynïakhaid biang lyngba ka kol jong u Himanshu.
Ka kol kaba lai ka dei ka kol kaba itynnad na u Deibormame, ha kane ka kynti u Babysunday u la long u nongpynbiang, da kaba pynrung ïa ka bol na ka bynta u paralok jong u. Haba mareh shakhmat u Deibor u la ïoh kylluid bha ka jaka bad u la khyrwit tyngeh ïa ka bol da ka kjat kadiang na shabar jong ka phyllaw kol, da kaba thmu beit beit sha ka liang kamon jong u nongap kol ka Punjab, u Karandeep Singh.
Watla katta ruh ka Meghalaya kam shym la ïoh mad ïa ka jingjop, ha kaba u Harmanpreet u la ïohlad ban pynkhihjar kaba la pynlong ïa ka jingïakhun ban ïakhaid da mar 3-3 kol.
Ka jingïalehkai ban wan jong ka Meghalaya ka la shah pynkynriah noh da shisngi. Mynta kan khreh ban aireng pyrshah ïa ka Services ha ka 27 tarik Kyllalyngkot ha Silapathar ha ka por 2 baje nohphai sngi. Mynta ka Services ka don ha ka kyrdan kaba saw ha ka Group da kaba kamai 2 poiñ na ki ar tylli ki jingïakhun.
