Shillong, Nohprah 18: Ka Meghalaya kan aireng pyrshah ïa ka Sikkim ban sdang ïa ka wat ïakhun ba nyngkong (Preliminary Round) jong ka Group E ha ka Senior Men’s National Football Championship na ka bynta ka Santosh Trophy 2025-26 ha madan First Ground-SSA Stadium, Polo, ha kane ka sngi Thohdieng (19 tarik Nohprah). Kane ka jingïalehkai kan sdang ha ka por 4 baje janmiet.
Namar ba tang kawei ka kynhun napdeng ki lai tylli kiba don ha ka Group – kawei pat ka dei ka Arunachal Pradesh- kaba lah ban rung sha ka wat ïakhun ba khatduh (Final Round) ha u bnai ban wan ha Assam, kumta man la ka jingïalehkai kan long kaba kongsan bad ka kynhun jong ka jylla kwah ban sdang ha ka rukom kaba bha ryngkat bad ka jingkyrshan jong ki paidbah. ïa ki tiket yn sa die ha ka jaka ïalehkai shuwa ka jingïalehkai.
Namar ka jingbun ki sap ïalehkai kiba tbit ka la long shisha ka jingeh ïa u coach Bah Khlain Pyrkhat Syiemlieh, ban pynduna bad ban jied ïa ka kynhun ba pura jong ka Meghalaya. Dei hapoh ka jingpynïaid jong u ba ka Meghalaya ka la jam shaduh ka phainal jong ka Santosh Trophy ha u snem 2022-23 ha kaba ka la shah rem noh ha ka Karnataka. Katei ka snem ka dei ka jingïalehkai kaba bha tam jong ka Meghalaya ha katei ka lympung ba pawnam jong ka ri. Katba mynta u snem kane ka kynhun kan kwah ban pynbha shuh shuh ïa ka jingïakhun, hynrei shuwa kata ki dei ban pynleit jingmut nyngkong ha ki jingïakhun ba sdang bad ka jingïalehkai ba nyngkong pyrshah ïa ka Sikkim.
Ka kynhun ïalehkai jong ka Meghalaya mynta ka pher bak-ly-bak na ki kynhun ïalehkai ba la leit noh jong ka Santosh Trophy bad ka long kumjuh ruh ïa ka Sikkim.
Kine ki ar tylli ki jylla ki la ïakynduh bunsien ha ki kyrdan ïalehkai bapher bapher ha ka phutbol shynrang bad kynthei. Ka jingïalehkai ba khatduh hapdeng jong ki ha ka Santosh Trophy ka la jia ha ka aïom lehkai ba kyrpang jong ka Meghalaya – 2022-23. Watla ka Meghalaya ka la pynliem ïa ki katto katne ki kynhun ba paw ban poi sha ka kyrdan ba ar ha katei ka snem, hynrei pyrshah ïa ka Sikkim ka la ïakhaid khlem kol ha ka jingïakhun group stage.
Ha kawei pat ka liang, ka Sikkim ka don ïa u coach ba tbit bad uba ïoh ïa ka AFC B License, kata u Gyaltshen D Moktan. Ki katto katne ki rangïalehkai kiba don ha ka kynhun ïalehkai jong u ki kynthup ïa u Sanjay Rai, uba la don bynta ha ka ATK ha ka por ba u dang khie samla (mynta ka Mohun Bagan Super Giant) bad u Narayan Chettri, uba don mynshwa ha ka kynhun ïalehkai ba kyrpang jong ka Kerala Blasters. ïa kane ka kynhun la pyndap da ki nongïalehkai na ka A bad B Division jong ka Sikkim, ki ar tylli ki kyrdan ba ha khlieh duh jong ka phutbol ha ka jylla, kumjuh ruh katto katne kiba ïalehkai ha kiwei pat ki jylla.
Hynne ka step ha Shillong, ka kynhun ïalehkai jong ka Meghalaya ka la ïoh ïa ki kyntien ai mynsiem na u President ka Meghalaya Football Association – Bah Hamletson Dohling, u General Secretary Bah Sunesh Syiem bad u Executive Member – Bah Freddy Kharpran. U Bah Hamlet u la pynpaw ka jingsngew skhem kaba pura ha ki rangïalehkai kiba la shah jied bad pynkynmaw ba kane ka lympung kan long kaba kongsan ha kaba thaw ïa ka buit treikam bad ka rukom jied ïa ka Meghalaya na ka bynta ka National Games 2027, ka ban long ha kane ka jylla.
Ka thup kyrteng jong ka kynhun ïalehkai ka jylla Meghalaya ki long:
Goalkeeper – Wanteilang Malngiang, Banshanskhem Kharsyntiew, Nister Roy Suting
Defender – Wanboklang Lyngkhoi, Apborlang Kurbah, Wilbert D Marbaniang, Iohborlang L Lyngkhoi, Allen Camper L Nongbri, Arlangky Nongsiej, Mebankhraw K Wahlang
Midfielder – Hamedamanbha Wahlang, Riborlang L Lyngkhoi, Babysunday Marngar, Dibormi Kassar, Mebanshngain Kurkalang, Fairming Suting, Robertson M Khongriah, Hardy Cliff Nongbri, Kynsaibor Lhuid
Forward – Shano Tariang, Deibormame Tongper, Dawanchwa C Challam
Support staff:
Khlain Pyrkhat Syiemlieh (Head Coach), Sailon Syngkrem (Assistant Coach), Dious Lapasam (Goalkeeping Coach), Cliff R Nongrum (Manager), Wanbokstar Syiemiong (Physio).