Santosh Trophy 2025-26: Mynta yn aireng ka Meghalaya ïa ka Arunachal

Shillong, Nohprah 22: Ki nongkyrshan jong ka Meghalaya kin kyrmen ïa ka jingai sngewbha na ka kynhun ïalehkai phutbol ka jylla ha ka dur jong ka jingjop pyrshah ïa ka Arunachal Pradesh ha ka jingïalehkai ba khatduh jong ka Group E jong ka lympung Senior Men’s National Football Championship na ka bynta ka Santosh Trophy 2025-26.
Kane ka jingïalehkai hapdeng kine ki arliang mamla ka ban long ha kane ka sngi Ba-ar kan sdang ha ka por 4 baje janmiet bad yn die ïa ki tiket ha katei ka jaka ïalehkai, ha madan First Ground-SSA Stadium, Polo.
Kane ka jingïakhun kan long kum ka phainal ïa ka Meghalaya namar ba mynta ka don ha trai duh jong ka Group hynrei ka tip thikna kaei kaba ki donkam ban leh khnang ban kiew sha ka kyrdan ba ha khlieh duh. Namar ba tang kawei ka kynhun na kawei pa kawei ka Group kin jam shakhmat sha ka wat ïakhun ba khatduh (final round), ka kynhun ba ïalehkai hala ïing ka don ïa ka kamram ba kan pyndep.
Dang ha kane ka Sngi U Blei ka Arunachal ka la pynliem ïa ka Sikkim da 1-0 hynrei ar sngi shuwa kata ka Sikkim ka la wanphai na ka shi kol ban jop ïa ka Meghalaya da 2-1. Ka jingjop ha ka sngi Ba-ar na ka bynta ka Meghalaya kan buh ïa baroh lai tylli ki kynhun ban ïaryngkat mar 3 poiñ dei tang hangta ba ka jingpyndonkam ïa ka jingïapher kol kan sa wan ban treikam. Watla katta, tang ka jingjop kaba da 1-0 kan nym biang ïa ka Meghalaya ban pynthikna ïa ka jaka; hynrei ka jylla kan hap ban thep ym duna ïa ka ar kol ban bat hi ïa ka kyrdan ba ha khlieh duh ha ka Group E. Katba ka Arunachal pat kan donkam tang ban ïakhaid ban jam shakhmat.
Watla ka Meghalaya kam shym la don bynta ha ka Sngi U Blei, hynrei ka kynhun ka la peit bha ïa ka jingmih jong ka jingïakhun hapdeng ka Sikkim bad ka Arunachal bad da kaba kyrmen ba ka resol kan mih kumba ki kwah. Lah ban kdew ba ka Meghalaya ka donkam ïa ka Arunachal ban jop hynrei ym da ka jingïapher kaba heh palat – bad ka la jia kumba ki kwah, ha kaba u Rinchin D Karma u la pynjop ïa ka Arunachal da 1-0 kol. Ka jingjop ïa ka Sikkim lane wat tang ka jingïakhaid ruh kan jin da la weng noh ïa ka Meghalaya na ka jingïaknieh.
Kumba ka paw ka jingwan tuid ki nongkyrshan ka la long kaba thikna ha ka sngi Thohdieng, ha kaba ki paidbah kiba bun ki la wan ban kyrshan ïa ka kynhun jong ka jylla pyrshah ïa ka Sikkim bad kin sa donkam biang ïa kum kane ka jingkyrshan ha ka sngi Ba-ar ban ai mynsiem ïa ka kynhun.
Ka Meghalaya ka la lah ban ïalehkai bha ïa ka jingïakhun pyrshah ïa ka Sikkim hynrei ka jingduna ka jingsngewthuh jingmut ban ïatreilang ka la pynlong ïa ka kynhun ba kan mad ïa ka nam rem. Kadaw jong kane ka lah ruh ban dei namar ba bun ki nongïalehkai la jied na ki klob bapher bapher bad ki la ïoh por lyngkot ban pynkhreh na ka bynta ka Santosh Trophy
Da kaba ïoh por khyndiat sngi shuwa kane ka jingïakhun ba khatduh ka kynhun ka la dei ïoh ban pynbeit bha ïa kane ka mat bad kin khmihlynti ban pyndonkam ïa ka jingkyrmen ba la ai ha ki ban pyrshang bad jop da ka jingïapher kol kaba heh bha pyrshah ïa ka Arunachal khnang ban ai eiei ïa ki nongkyrshan na ka bynta ka jingkyrshan jong ki bad ban ïaid lyngba sha ka wat ïakhun kaba khatduh ban long ha u bnai ban wan, ha Assam.