Santosh Trophy 2025-26 Final Round: Ngat ka Meghalaya ha kajuh ka Group ba kynthup ïa ki lahduh barim

Shillong, kyllalyngkot 02: Ka Meghalaya kan hap ban durut tyngeh ha ka wat ïakhun ba khatduh (Final Round) ha ka lympung 79th Senior Men’s National Football Championship na ka bynta ka Santosh Trophy 2025-26 hadien ba ka la shah pynngat ha ka Group ba kynthup ïa ki katto katne ki lahduh barim.
ïa ka jingpynïakap kynhun (draw) la pyndep ha ka 31 tarik Nohprah ha ophis treikam (headquarter) jong ka All India Football Federation ha New Delhi. ïa ka wat ïakhun ba khatduh yn pynlong da ka Assam naduh ka 21 tarik Kyllalyngkot, ha kaba ki don 12 tylli ki kynhun kiba la phiah ha ki ar Group ba mar 6 tylli kawei kawei.
Ka jylla ban pynlong ïa ki jingïalehkai ka Assam, ka West Bengal kaba bat ïa ka burom lahduh, ka Tamil Nadu, ka Uttarakhand, ka Nagaland bad ka Rajasthan ki la shah thup ha ka Group A.
Ka Meghalaya, Kerala, Services, Punjab, Odisha bad ka Railways ki pynlong ïa ka Group B. Ka Kerala kadei ka kynhun kaba pyndep kyrdan ba ar (Runners-up) ha u snem ba ladep bad bad ki la rah nam lahduh la katto katne sien, kaba khatduh ka dei ha ka samoi 2021-22. Ha kawei pat ka liang, ka Services, ka la long lahduh ha ka samoi 2023-24 bad dei maka kaba la pynkhyllem noh ïa ka Meghalaya ha ka samoi 2024-25 ha ka quarterfinal.
Katba ka Punjab ka la rah khatduh la slem bha, ha ka aïom lehkai 2007-08 – hynrei ka la wan kyrdan ba-ar lai sien naduh katei ka por. Kaba kham slem shuh shuh ka long jong ka Railways – ha kaba ka hap ban phaidien 60 snem ba ki la rah khatduh ïa ka khusnam – hynrei ki la pyndep kyrdan ba-ar ha u snem 2013-14.
Ka Meghalaya bad ka Odisha kim pat ju jop ïa ka nam lahduh hynrei ka jingïalehkai kaba bha tam jong ka Meghalaya ka dei ha u snem 2022-23 ha kaba ka la shah pynliem noh ha ka phainal da 3-2 da ka Karnataka. ïa kane ka kynhun la ïalam da ujuh u coach uba ïalam ïa ka kynhun mynta u snem – u Bah Khlain Pyrkhat Syiemlieh.
Ka Meghalaya ka la mad ïa ka jingïakhun kaba jwat bha ha ki jingïalehkai group stage ha u bnai ba la dep hynrei ka la lah ban rung sha ka wat ïakhun ba khatduh hadien ba ka la pyndep ha khlieh duh jong ka Group kaba kynthup ïa ka Sikkim bad ka Arunachal Pradesh. Wat hapdeng ka por shuti ka kynhun ka la trei shitom bha ban pynkhreh ïa ki jingïakhun ba kongsan kaba ki kyrmen ban ïaid shakhmat.
Ka Assam ka la ïoh ban rung beit beit sha ka wat ïakhun ba khatduh kum ka jylla ba pynlong ïa ki jingïalehkai, katba ka West Bengal bad Kerala ki la rung hi dalade kum ki kynhun lahduh bad ba ar jong u snem 2024-25.
Ki saw tylli ki kynhun kiba wan hakhmat eh na kawei pa kawei ka Group kin rung sha ka wat ïakhun Knockout. Ka Quarterfinal kan long ha ka 02 bad 03 tarik Rymphang, ka Semifinal kan long ha ka 05 tarik Rymphang bad ka final kan long ha ka 08 tarik Rymphang.