Shillong, Nohprah 22: Ka Meghalaya ka la pynthikna rung sha ka wat ïakhun Quarterfinal jong ka Senior Men’s National Football Championship na bynta ka Santosh Trophy 2024-25 da kaba pynliem ïa ka Goa da tang 1-0 kol ha ka jingïalehkai na ka Group B ha Hyderabad hynne ka sngi U Blei.
Watla ki la don shibun ki lad bad ki kabu ksiar ban pynkhihjar ha kane ka jingïalehkai, hynrei dei ka penalty ha ka minit kaba 89 kaba la wanrah ïa ka jingïapher ban pynïakhlad ïa kine ki arliang.
Kane ka la jia hadien ba u wei na ki rangapdien ka liang pyrshah u la tan ïa ka sopti jong u Deibormame Tongper bad u referee u la kdew beit beit ban rai da ka penalty. Hadien nangta u Damanbhalang Chyne khlem da pynsep-ei u la shim ïa kane ka lad ban buh hakhmat ïa ka kynhun na katei ka penalty.
U Shubert Pereira u la dei ban ïoh pynïakhaid na bynta ka Goa ha ka khyllipmat jong ki minit pynjlan hynrei u la khlem shym la lah ban tehlakam bha ïa ka bol ha kaba ka jingpyrshang jong u ka la lait sharud.
Lah ban kdew, ka Meghalaya ka la long ka kynhun kaba kham khlaiñ ha baroh kawei ka jingïalehkai naduh ba sdang, ha kaba ka la ïoh ban tehlakam bun shah khamtam ha kaba ïadei bad ka jingpyrshang thep kol kaba la pynlong ïa ka Goa ban kynrandien bad ïakhun ban pynskhem ba bak. Hynrei, kiba bun ki jingpyrshang thep kol jong ka Meghalaya kim shym la long kiba biang paka wat ban pynma ïa u nongapkol ka Goa, u Sanij Bugde.
U coach ka Meghalaya u Bah Hering Shangpliang u la pynkylla ar ngut ki player na ka kynhun kaba la sdang pyrshah ïa ka Delhi, ha kaba u Fullmoon Mukhim u la wanphai biang hadien ba u la mynsaw ryngkat bad u Owanijuh Pajuh, katba u Arlangky Nongsiej bad u Khrawkupar Jana ki la shah pynshong ben na bynta kane ka jingïalehkai.
U Khrawkupar u la mih madan kum u nongbujli ha ka kylla step, bad ryngkat bad u Owanijuh bad u Donlad Diengdoh hakhmat, ka Meghalaya ka la nang kham khlaiñbor shakhmat hynrei ka kynhun kam pat lah ban shem ïa ka kol pyrshah ïa ka kynhun na Goa kaba la ïakynduhjingeh ha ka wat ïakhun ba khatduh jong ka mynta ka samoi ha ka Santosh Trophy.
Ka Goa, kaba la wan kyrdan ba ar ha ka samoi ba la dep, ka don ha trai duh jong ka Group B shuwa ba kan pynliem ïa ka Tamil Nadu da 1-0 ha ka sngi Palei, kajuh ka sngi ba ka Meghalaya ka la ïoh ban khur ïa ka jingjop kaba nyngkong da kaba pynliem ïa ka Delhi da 2-0.
Hynrei wat la katta ruh, ka penalty jong u Damanbhalang ka la pynïoh ïa ka Meghalaya ïa ki poiñ kiba ka donkam. Ha kawei pat ka jingïalehkai hynne ka sngi, ka Odisha bad ka Tamil Nadu ki la ïasam mar 1 point naba ïakhaid mar 1-1 kol. Ka jingïakhun kaba bud ka long hapdeng ka Delhi bad ka Kerala.
Ka jingjop ka la kyntiew ïa ka Meghalaya sha ka kyrdan ba ar ha ka miej point (watla kane ym pat lah thikna, naba ka Delhi ka lah ban knieh ïa kane ka kyrdan) bad ka Jylla ka la biang pura ban buh jaka ha ka thup Top 4 watla ki resol jong ki jingïakhun ba dang sah kin long sa kumno kumno ruh.
Kumba long mynta ka Kerala ka ïoh 9 point, ka Meghalaya 7 point, ka Delhi 6 point, ka Odisha 4 point, Goa 3 point bad ka Tamil Nadu 2 point.
Ka Meghalaya kan ïakhun ïa ka jingïalehkai ba khadduh ha ka sngi shuwa ban jam sha ka Khristmas (24 tarik Nohprah) ha ka por 9 baje mynstep pyrshah ïa ka Odisha.
