Kane ka jingtrei torti ïa ki surok bapher, ka long kaba la jubor haduh katta katta, ha kaba wat ka Meghalaya High Court, ka la hap ban byrthen ïa ki katto katne ki tnat shna surok kum ka NHAI, NHIDCL nalor kiwei pat bad na kine ki jingtrei torti, kiba paw tyngkreiñ bad kiba la ijli sat, ki kynthup ïa ka surok NH 6 bad nangta ïa ka surok Shillong Tamabil, ha kaba kine ki dei ar tylli ki jingtrei kiba shu shah kynthah man ka por bad kiba paw bha ruh ha ki kotkhubor.
Kam dei tang katta, haba peit ïa ka jingsniew tasam ki surok, la ïohi, haduh ha ka nongbah Shillong bad kane ka pynkynmaw, ïa kaba la kren shai da U Bah Charles Pyngrope, MLA ha ka dorbar ba ladep, ha kaba ula kynthoh jur halor ka jingsniew tasam ka surok jong ka thaiñ Umpling, katba ula ong shuh shuh, ba ka surok kaba bha ka dei tang na ïing jong u, haduh ha Ïing jong u Bah Prestone, uba dei u Myntri PWD.
Ka jingtrei ka dei kaba la bam bun bah ka pisa jong u paidbah bad ka jingtorti, ka kynthup ruh ïa bun bah ki surok sha Garo hills bad haba kumta, kane kam dei shuh ka mat kaba rit bad ka la donkam ïa ka jingtih tyllong halor ka jingsam ïa ki work order, ka jingsam ïa ki kam bad ïa ka jingbuh por, ba ki kontraktor ba kin pyndep bad ba kin sumar ruh ïa kitei ki surok bad ïa katei ka bynta, ym dei shuh ban ieh ha ka PWD, hynrei, ka la donkam ïa kano kano ka tnat kaba kyrpang, lada dei ïa ka ACB (anti corruption branch) jong ka sorkar jylla lane ïa ki nongbishar jong ka High Court, ba kin tih bniah ïa kane ka jyrsieh, ba kin wad ïa kito ki kontraktor, ki bym trei thikna ïa la ka kam bad ïa kiba kum kitei, ba ki dei ban thoh noh da u dak saw, ba kin nym ïohlad shuh ha kine ki kam leh tuh bad bam kruiñ ïa ka roi ka san uba bun balang.
Ki don bun ki projek surok, kiba la hap ruh ban shu shim da ka ram bad katei ka kynthup ïa ka surok NH 6 bad nangta ka surok Dawki bad nalor ba ki surok kim long shuh kiba biang ban ïaid, nangta sa ka jingpynïeng khyrdop, ka ban sa sdang noh shen ba ki nongleit nongwan, kin hap ban ïa siew khajna man ka sngi ban ïoh siew ïa ka ram kine ki kompeni kiba nabar; kumta ka la donkam ïa ki tnat tohkit jong ka sorkar India ruh, ba kin shimti ban tih bniah ïa kane ka kynrum kynram ha ka kam shna surok.
Kumba long mynta naba ïa ka sorkar jylla la lamkhmat da ka seng NPP kaba ïatrei lang bad ka BJP, UDP bad kiwei hapoh ka Sorkar Pdeng ka la hap ban shim bun bah ka ram ban pynurlong ïa ki kam kiba ka la khlei ha ka por elekshon.
Ha kaba ïadei bad ki jingeh kiba la mih na ki jingsniew palat jong ki surok hapoh ka jylla la ong ruh ba na kine ki jingsniew ki surok ka la wanrah ka jingeh kaba khraw bha ia ki nongshong shnong.
Kat shaba phai la ïohi ba bun ki surok khamtam hapoh nongbah Shillong ha kine ki sngi ki la kylla long thliew bad ki la dap tang da ka ktieh bad lang um ha kaba kane ka la wanrah ka jingeh kaba khraw ïa kiba ïaid ba ïeng bad khamtam ruh ïa ki kali kiba ïaid manla ka sngi.
Kumta ha kaba ïadei bad kane la donkam ïa ki bor badei khmih ban shim ïa ki lad ki lynti ban maramot khamtam eh ba ha kine ki por ba rang jong u slap.
