Sangeh siew bill bording shipor katba ym pat lah ban weng ïa ka ‘SAI COMPUTER LTD’: SKNS

Mawkyrwat, Naiwieng 25: Ka Synjuk ki Khlieh Nongsynshar Shnong Mawsynram Block (SKNSMB) ha ka sngi Baar ki la rai paidbah ba ïa mynta shipor kin ym siew bai bording sha ka SAI Computer Limited katba ym pat don ka jingïapynbeit na ki bor ba dei peit bad na ki bor sorkar.
Kane ka rai ka mih hadien ba Synjuk ki Khlieh Nongsynshar Shnong Mawsynram Block hapoh ka jingïalam jong u Chairman Bah Hiamdor Rapsang bad u Secretary u Bah Kyrmen Shangdiar ki la leit ban ïa kynduh ïa u Project Manager jong ka FEDCO u Rajeev Ranjan, kaba la ai kyrteng sha ka SAI Computer Limited, Mawsynram Sub-Division bad ki la lap ba kane ka kompeni kam don ïa ki kot ki sla kiba biang naduh ka NOC bad ka Trading License la ka long na ki shnong bad na ka District Council.
Ka jingleit ïa kynduh jong ki ka long namar ka jingsngap jar jong ka Sorkar halor ka kaiphod ba ka Synjuk la phah ban pyrshah ïa ka jingai bor sha ka SAI COMPUTER Limited ïa ka jinglum bai thang bording ha ka thaiñ Mawsynram.
Ka Synjuk ka la pyrshah ruh ïa ka SAI Computer Limited ba kan pynïaid shakhmat ïa ka kam bad ha kajuh ka por ka la shim ïa ka rai ba ki rangbah kin sangeh siew bai bording shipor katba ym pat lah ban weng ïa kane ka kompeni namar ka jingkwah jong ka Synjuk bad ki paitbah nongshong shnong ka thaiñ ka long ba ka MePDCL ka dei ban shimti hi noh ban pynïaid ïa ka bording ha ka thaiñ.
Ka Synjuk ka la maham ba lada ka Sorkar kam patiaw ïa kane ka jingpynsngew kin pynlong da ki jingïakhih paitbah.