Sangeh noh ka kynthoh shimet hynrei pynleit jingmut ban pyntyllun ïa ki kam ka Council: Titos

Shillong, Risaw 23: U Nongïalam ka Liang Pyrshah ka Khasi Hills Autonomous District Council (KHADC) u Bah Titosstarwell Chyne ha ka Dorbar Tlang ha ka sngi Palei u la kyrpad ïa ka Executive Committee (EC) ba la ïalam da ka Voice of the People Party (VPP) ba kan sangeh noh ban kynthoh shimet hynrei ka dei ban trei ban pynbha ïa ka rukom treikam ka District Council bad ki kam pynroi jong ka bad ban pynleit jingmut ban pyntyllun ïa ki kam ka Council.
Haba ïashim bynta ha ka Motion halor ka phang jong ka Non-Tribal Employee Clearance Certificate (NTECC), u Bah Titos ula kren halor ka jingkhynra ba la pynlong da ka KSU ha ka jaka jngohkai pyrthei ha Sohra’s Jiva resort ha kaba la lap ïa ki slip ba rong lieh bad rong pink ba la ai sha ki nongtrei bar Jylla ha katei ka por.
Une u MDC u la pynpaw ruh ïa ka jingsngewsih ba uwei na ki Executive Member (EM) ka KHADC u la buh da ka Status ha ka WhatsApp da ka jingthmu ban kynthoh shimet pyrshah ïa u. “U Executive Member u la buh jingkylli balei ki Sengbhalang jong ka Sohra ki sngap jar haba u CEM uba dei u MDC ka Sohra, u la ai labour license ha u snem 2021?
Halor kane u MDC ka Sohra u la pynpaw ba um kwah satia ban kren halor katei ka mat mynshwa, hynrei mynta um lah shuh ban shu sngap jar bad haba ïohlad ha kane ka motion u shim ïa kane ka kabu.
U la ong, “U EM ha ka jingong jong u ha ka social media, u la buh jingkylli ba shano ki nongïalam sengbhalang jong ka Sohra ha ka por ba u CEM uba dei u MDC jong ka Sohra, u la ai ïa kane ka labour license ha u snem 2021? Balei ngi dei ban shim ïa kiei kiei kum ki jingkynthoh shimet? Balei ngi pynlong ïa kiei kiei kum ki jinglong shimet? Kaei ka jingdonkti jong nga ha ka jingkhynra ba la pynlong da ki sengbhalang, Phi sngew ba ka long kaba dei ban kynnoh ïa nga ba nga la phah ïa ki? wat ba kaei kaba ki EC ba mynshuwa ki leh, lada phi sngew ba ka long kaba bakla, ka dei ka kamram jong phi ban pynbeit ryntih ha ka jaka ban shu kynthoh shimet,” la kynthoh u MDC ka Sohra.
Na ka liang u Bah Chyne ula pynshai ba ka KHADC kam don bor shuh ban ai labour license hadien ba ka Sorkar Jylla ka la pyntreikam ïa ka aiñ jong ka Jylla kaba ïadei bad ki nongbylla bar Jylla.
U la pynpaw ba ka Executive Committee (EC) kaba mynshwa ka la ai ïa ki non-tribal clearance certificate sha ki nongbylla bar jylla namar ba ki briew ki shaniah ha ka District Council ban tehlakam ïa ka jingwan tuid jong ki nongbylla bar jylla sha kane ka thaiñ. Hynrei u la kubur bad pynpaw ruh ba ki don ki jingduna ha ka rukom treikam kane ka bynta.
U MDC ka Sohra u la pynpaw ruh ba ka kamram jong ka EC kaba thymmai ka long ban pynbha ïa kiei kiei kiba dang duna, ym ban kynnoh bad kynthoh iwei ïa iwei pat.
U la ong, “Haba ngi don ha ka bor, ngi leh ïa kiei kiei da ka jingtip. Ngi sngewthuh ruh ba ka kyrdan jong ngi ka long kaba shipor, bad kata ka por kan sa poi ba ngin hap ban plie lad ïa kiwei pat, bad lada ki lap ïa kaei kaei kaba ym dei, ki dei ban pynsangeh noh ïa ka. Kam dei ba tang namar ba kiwei ki leh ïa kaei kaei, ngin leh lang kumjuh. Lada phi tip ba ka long kaba bakla, nga khmih lynti ba kito kiba wan hadien kin pynbeit ïa ka ym ba kin thad burom ia ki jingim shimet jong kiwei.”
Halor kane u Bah Chyne u la kyntu ïa ka District Council ba kan leh ïa kaba dei ha kaba ïadei bad ka kam labour license khnang ba kan ym buh ïa ka Council ha ka jingshah kynthoh kylla.
Ha ka jubab ïa ka jingsngewkhia u Nongïalam ka Liang pyrshah u CEM u Bah Winston Tony Lyngdoh u la pynpaw ba um shym la kynnoh eiei pyrshah ïa u hynrei u la shu pynpaw ba la pynmih ïa ka NTECC ha ka por ba u long CEM u MDC Sohra bad u la iathuh ruh ba u la dep ban pynshai ïa kiba bun kiei kiei halor kane, hynrei kiei kiba mih pat ha ki Social Media ki la shu sot ne shim tang ïa ka bynta kaba khlem da pyni ne ïathuh lut ïa ki jingkren kumba la shon ha ki lad pathai khubor.
U la pynshai ba ka jingkren jong u kam dei ban pynjah burom ïa u Nongïalam ka Liang pyrshah hynrei ban ai ïa ki jingshisha bad ban pynshai ba ka NTECC ka la sdang ha ka por ba u dang bat ïa ka shuki CEM bad khlem don jingthmu satia ban kynthoh ïa ka kam ba shimet ne ban thad rong ne pynjah burom ïano ïano ruh.