Sangeh leit thep vote ki paid ka ‘Elaka Labang Nangphyllut & Pangam Raliang’ sha ka KAAC

Jowai, Jylliew 08: Bun ki paidbah nongshong shnong ha ki thaiñ khappud jong ka Elaka Labang Nangphyllut & Pangam Raliang kiba dei ki Pnar ki la sangeh ban leit thep vote mynta ka sngi 8.6.2022 sha ka Election Member of Autonomous Council M.A.C jong ka Karbi Anglong Autonomous Council, Assam.
Ka daw ba la pynlong ïa kitei ki nongshong shnong ka Block-1 ban nym leit thep vote shuh shapoh ka Assam ka long halor ki nongrim ba kim shem la ïoh jingmyntoi eiei kum ki nongshong shnong ka Ri ha ka liang ka ïoh ka kot naduh ki lynti ki syngkieng, ki jaka pule puthi bad jaka sumar kumjuh.
La ïathuh na ka por sha ka por ki tei ki nongshong shnong kila shah pynthut ha ki briew jong ka Assam ha ka liang ka synshar ka khadar bad kumjuh ha u pud u sam, wat ha ka snem August 2015 la don ruh kiba la shah beh shnong kaba la pynlong ïa kitei ki nongshong shnong ban leit phetwir sha kylleng ki jaka.
La pynsngew ruh na ki briew kiba dei na katei ka thaiñ wat ïa ka khaïi ka pateng ruh kim ïoh shuh ban leit khaïi ïala ki jong ki mar ki mata kiba dei hok jong ki, namar ki briew jong ka Assam kim shem ka ailad ïa ki nongshong shnong ka ban pynïaid ïew ïa kitei ki mar jong ki.
Ïa kane ka jaka Elaka Labang Nangphyllut & Pangam Raliang la pynhap noh ïa ka sha Assam katkum ka Notification No.TAD/R/31/50/149, dated 13 th April 1951 ban pynkha ïa ki District Council haki jaka bashong basah daki jait bynriew ritpaid jong ka jylla Assam la khlad jubor ïaka Elaka Labang Nangphyllut naka Jowai Civil Sub-division bad pynhap jubor noh sha United Cachar & Mikirs Hills District haka jaka ban don hapoh ka United Khasi & Jaiñtia Hills District mynshwa.
Kiba bun na kitei ki shnong ha Block-1 haduh mynta kiba la don haduh 36 tylli ki shnong Khasi Pnar kila kwah ba Elaka Labang Nangphyllut & Pangam Raliang dei ban re-transfer biang ïaka sha Meghalaya.