Nongstoiñ, Nailur, 23: Ki nongïalam jong ka Synjuk ki Kontraktor ka tnad PHE kaba la tip kum ka PHE Western Circle Contractors & Suppliers Association, ha ka jingïalam jong u bah J.T.S.Thongni President ka Association kaba kynthup ïa ka Mairang, Nongstoiñ bad Mawkyrwat Division kiba hap ha ka jingpeit jong ka Wesrtern cicle, haba ïakren bad ki nongthoh khubor, ki la ong ba naduh mynta ka sngi baroh ki Contractors kiba ïoh jingtrei na katei ka skhim JJM kin sangeh shuwa ïa baroh ki jingtrei.
U bah J.T.S.Thongni u la ong ba ïa katei ka rai la shim ha ka jingïalang kaba la long ha u bnai Nailar ba la dep kaba la ïa mynjur lang da baroh ki dkhot jong ka Association. U la ong ba hadien ki la thep ïa ki Tender bad ki la pyntrei ïa ki jingtrei ka sorkar ka la khate ïa ka pisa kaba dei na ka bai bylla jong ki nongtrei kaba ki kontraktor ki dei ban ïoh.
U la ong ruh ba ka sorkar ka la kam ba ka jingkhate ïa ka bai bylla ka long na ka bynta ban siew ïa ka bai tiar sha ki Kompeni kiba pynpoi ïa ki pipe bad kiwei kiwei ki tiar. U bah Thongni u la ong ruh ba ka jingleh jong ka sorkar, ka la ktah haduh katta haduh ba ki la hap ban leit ai da ka jingthoh sha ka sorkar ban pynkynmaw biang, ba ka dei ban lada kam pat lah ban pyntreikam ïa ka dor kaba ka la dep pynthymmai, ka dei ban pyntreikam shuwa da ka dor ka barim hynrei kam dei pat ban ktah ïa ka bai bylla.
U la ong ruh ba ka Association mynta ka kyntu ïa baroh ki Kontraktor kiba ïoh jingtrei ha poh ka tnad PHE ïa mynta kin sangeh shuwa ban pyntrei, hynrei lada ka sorkar ka sngap mynthi kim banse ban leit tied jingkhang sha Ïingbishar bad dawa ïa ka hok jong ki.
