Shillong, Naitung 13 : U Myntri Rangbah ka jylla u Conrad K Sangma u la bthah ïa ka Liang Pyrshah All India Trinamool Congress (AITC) ban sangeh shisyndon na ka jingïaleh ne pynkylla politik ïa ka kam ïa pynbeit pud pynbeit sam hapdeng ka Meghalaya bad Assam namar ïa kane ka soskular ba la ïasoi hapdeng ki ar jylla la pynshong nongrim da ka kaiphod kaba la phah sha ka sorkar Assam da ka sorkar ba ïalam u Dr Mukul Sangma.
“ Nga kyntu ïa ka AITC ba kane ka mat kam dei ka kam ban ïaleh politik namar ki paid khappud ki la mad da shisha ïa ki jingjynjar la sanphew snem mynta” ong u Myntri Rangbah.
ïa kane ula kren hadien ba u la ïohi ïa ki jingkren u nongïalam ka Liang Pyrshah u Dr Mukul Sangma ba ka AITC kan pyndam noh ïa kane ka soskular ba la ïasoi hapdeng ka Meghalaya bad Assam lada ka wan ha ka bor ha u 2023. “ Ka long kaei kaei kaba sngewsih ban ïohi ba u Dr Mukul u nongialam ka AITC un kren khyllung kumne namar ban ïakren shai, u la ïalam ïaka sorkar ban synshar haduh 8 snem lynter hynrei u khlem leh ei ei halor ka kam pynbeit pud bad mynta haba ula ïohi ba ka kam ka la ïaid shakhmat u kwah ban pyndam pat ïa ka soskular namar lehse ba kim shym la ïadon bynta ban ïa pynbeit ïa kane ka jingeh ngam tip balei bad kaei kaba pynsngew ïa ki ban kren da kumne. Nga dang pyrkhat ba kin sangewtynnad ba ha kaba khatduh la lah hi ban leh ei ei ïa u pud u sam kaba dei ka kam kaba jwat tam baroh shikatta” ong u Conrad.
U la ong ba u Dr Mukul ula kren halor kita ki jingjurip ïa u pud, ïa ki map ka tnad revenue hynrei kine baroh ki dei kiba la pynkhreh lut nadong shadong da ka sorkar hapoh ka jingïalam jongu ha u snem 2011.Lada hap ban bishar bniah ïa kata ka map ba la pynkhreh ha ka jingshisha la dei ban bishar bniah naduh u snem 2011-12 shwa ba un ai sha ka sorkar Assam.
La ka dei ka sorkar Congress ne sorkar NPP, ka jingshisha ka long ba ka sorkar Meghalaya ha u 2011 ka la pynkhreh ïa ka revenue map bad ai sha ka sorkar Assam ba ki don haduh 12 tylli ki jaka ba don hapdeng ka jingïakajia.
“ Mynta pat kine ki juh ki briew kiba thaw ïa ka map ki ong ba dei ban phai dien bad bishar bniah biang ïa ka map. Hato phim dei ma phi Dr Mukul ba leh ïa kine kiei kiei baroh? Ki kam ba phi la leh, ka kaiphod ba phi la pynkhreh , ka map ba phi la ai ki dei kito ki juh bad mynta lada phi kynnoh ruh ka long kumba phi kynnoh dalade ïa lade namar ngi te ngim ïa don bad ka sorkar jongphi ha ka por ba phi pynkhreh ïa ka kaiphod bad ai sha ka sorkar Assam. Mynta pat phi kylli balei ba ngi pdiang bad balei ba ngi bud dien ïa ki kam kiba phi la leh hi ne kiba ula dep aiti sha ka Assam” ong biang u Conrad.
U Conrad ha kaba ther tyngeh ïa u Dr Mukul ba u thmu pynkylla politik bad pynlong issue election ïa kane ka kam ïa pynbeit pud, u la ong “ Kine kim dei ki mat ban ïashim kabu dei ban phai bad shim kabu halor ki mat ban pynroi pynpar ïa ka jylla bad ïa kiwei kiwei ki mat kiba dei jong ki paidbah.
Ka sorkar Assam bad Meghalaya ki la ïasoi ïa ka soskular ban ïa pynbeit shwa ïa ki hynriew tylli na ki 12 tylli ki jaka ba ïa kajia bad ïa kane ka soskular la ïasoi ha nongbah Delhi ha ka 29 tarik Lber 2022 hakhmat u Myntri kam pohïing ka ri u Amit Shah.
“ Ngi ïa pynbeit ïa u pud u sam halor ka kaiphod bad map ba la ai da ka sorkar u Dr Mukul sha ka sorkar Assam bad nga sngew tynnad haduh katta katta ba 99 % na ki shnong ki la wan phai sha Meghalaya. Ki paidbah ki dei ban kmen bad ki dei ban ban pynthikna ba kane ka kam kan dep noh bad ban rung pat sha ka bynta ba ar jongka jingpynbeit ïa u pud u sam kata ïa ki 6 tylli kiwei pat ki jaka ba dang sahteng” ong u Myntri Rangbah.
U la ong ba kane ka sorkar ka la pyrshang katba lah ban pyndep noh ia kane ka kam ba sahteng da ki phew snem mynta. “ Ngi sngewkmen ba ngi ïoh ka jingkyrshan na ka sorkar pdeng bad ka sorkar Assam ba ngi la poi shaduh kane ka thong” ong u Conrad.
Haba la kylli lano ka wan jingïapynbeit ba ar kan sdang, u Myntri Rangbah u la ong kumba long mynta namar ka jingjulor na ka jingshlei um kumta ngin hap ïa pynleit jingmut shwa halor kane kak am kumno ban pynbiang bam ia ki lanot shlei um bad kumno ba ka jingim jong ki briew kan long kumjuh ha Assam bad wat ha Meghalaya ruh namar ka jingshah ktah na ka jingshlei um mynta ka kynti ka la shyrkhei bha. Kumta hadien ba la kut kine ki jingshlei um, lehse yn sa sdang noh ïa ka jingïapynbeit pud kaba ar.
