Sangah u Bah Prestone ïa u Bah Pala ba kynnoh ‘ïasuh buit’ ka Sorkar ban shimti ïa ka Them Iewmawlong

By Mawphor Editor On Sep 3, 2022

Shillong, Nailur, 02: Shi sngi hadien ba ka Sorkar ka la rai ban pynkynriah ïa ki 342 tylli ki longiing ka Sweepers’ Colony na Them Iew Mawlong sha ki Quarters jong ka Shillong Municipal Board (SMB), u Nongïalam ka Seng Congress u Bah Vincent H Pala ha ka sngi Palei u la kynnoh ba ka don jingïasuhbuit ha lyndei ka jingshimti jong ka Sorkar ïa ka jaka ha Them Iew Mawlong khlem da ïaid katkum ki kyndon kiba ïadei bad ka jingshimti ïa ka jaka.
Haba sangah tyngeh ïa u Bah Pala, u Bah Tynsong u la ong, ‘haoid, ka dei ka jingjop kaba khraw namarba baroh shikatta ki snem ka jingïasoi na ka bynta kane ka jaka ka dei hapdeng ka ophis ong u Syiem ka Hima Mylliem bad ka Shillong Municipal Board tang na ka jaka kaba rit. Hynrei hadien ka jingïakren kaba la bunsien bad ka ophis u Syiem ka Hima Mylliem lem bad ka Dobar Hima, ngi la pan ban aiti noh ïa ka jaka sha ka Sorkar. Namarkata, ainguh ïa U Blei namarba ki la mynjur ïa ka jingtyrwa bad ki la aiti ïa ka jaka ha Them Iew Mawlong.”
U la ong ruh ba u Bah Pala u lah ban ïakynduh ïa u lada um sngewthuh ïa ka jingïapher ïa ka kyntien hapdeng ka ‘land acquisition’ bad ka ‘lease agreement.’
“Lada jia ba um (Pala) sngewthuh shaphang ka ‘land acquisition’ bad ka ‘lease agreement’, ong ia u ban wan iakynduh ia nga bad ngan sa batai bniah bha ia u,” u la ong.
Haba pynpaw ba ka don ka jingiamynjur na ki lai mamla hapdeng ka Hima Mylliem, ka SMB bad ka Sorkar, u Bah Tynsong u la ong, “kam don kano kano ka jingsiew pisa. Kane ka dei tang ka jingiamynjur. Kane ka jingiamynjur ka long tang ban shim wai.”
“Lada u Bah Pala um sngewthuh, nga kloi ban batai bniah,” u la ong.
Ha ka 29 tarik Risaw, 2021 ka Sorkar Meghalaya ka la shimti ia ka jaka ha Iew Mawlong khnang ban pynkynriah noh ia ki briew kiba sah ha Sweeper’s Colony hadien ba la siew ia ka pisa kaba T. 2 klur sha ka ophis u Syiem ka Hima Mylliem.
Ka jingshimti ia ka jaka kaba heh 12,444.13 sqm ka long katkum iasoi ban shim wai kaba la iamynjur ha ka 31 tarik, Lber, 2021.
Ki lai mamla ki la iasoi ia ka dulir shimwai hapdeng ka sorkar Meghalaya, ka ophis u Syiem ka Hima Mylliem ba dka Shillong Municipal Board.
Ia kane la leh hadien ba ka Sorkar Jylla ka la rai ban pyntreikam ia ka jingai jingmut jong ka High Level Committee (HLC), kaba la aiti ia ka kaiphod ha ka 28 tarik, Nailur, 2021.