Shillong, Nailur 29 : Ka UDP 17 North Shillong Youth Wing shen kan sa pynlong ïa ka lympung ïalehkai basketball jong ki shynrang bad kynthei kaba la tip kum ka UDP 17 North Shillong Men’s and Women’s Basketball Tournament 2022. Katei ka tournament kan sdang ha ka 1 tarik u Risaw bad kaban kut ha ka 5 tarik Risaw 2022 ha madan Basketball ha Jaiaw Pdeng.
Na bynta ban pynïaid beit ïaid ryntih ïa katei ka tournament ki nongpynïaid ki la pynlong ka jingpynïakap (ties) ïa ki 15 tylli ki team ha la ki jong ki group ïa kaba la pynlong ha ka sngi Palei ba la pynbit pynbiang ïa katei ka prokram jingïalehkai da ka Meghalaya Basketball Association.
Ha kane ka sngi pynïakap ïa ki team la donlang ruh u Dr. Aman War u kyrtong ban sa ïakhun ïa ka ilekshon MLA 2023 na ka party UDP na 17 North Shillong Constituency uba dei ruh u nongïarap jong ka Youth Wing ban pynlong ïa katei ka tournament, Bah Joe Marweiñ President ka UDP 17 North Shillong, Bah George Lyngdoh Working President ka Meghalaya Basketball Association, ki official, ki nongkitkam jong ka Youth Wing bad ki kapten jong ki 15 tylli ki team ba ïashim bynta.
U Dr Aman War haba ai jingkren ha kane ka sngi u la ong ba ka jingpynlong ïa katei ka tournament ka long kum shi bynta ban pynshlur ïa ki samla ba kin pynpaw ïa ka sap ïalehkai ba ki don bad khamtam ba kin lait na ki jingsniew kiba bun rukom. U la ai khublei ïa baroh ki team kiban sa ïashim bynta ba kin ïalehkai bha khnang ba kin poi sha ka thong jong ka jingjop. U la ai khublei ruh ïa ka Meghalaya Basketball Association kaba la ïasnohktilang ha kaban pynbit pynbiang ban pynlong ïa katei ka tournament.
U Bah George E Lyngdoh haba kren sha ki lad pathai khubor u la ïathuh ba ka jingpynlong ïa katei ka tournament ka long ruh shi bynta ban ïoh jied ïa ki rang bad thei ïalehkai kiba tbit ban mihkhmat ïa ka jylla sha ki jingïalehkai National Level.
U President ka UDP 17 North Shillong Youth Wing u samla Dasanlang R Laitmonu la ïathuh ba ka jingpynlong jong ki ïa katei ka tournament ka long ban ai lad ïa ki samla pule kiba don hapdeng ki jingpule ba kin ïoh ban ïashim bynta ha ka jingïalehkai bad ai khublei ruh ïa ka Meghalaya Basketball Association kaba la wan ban ïarap ïa ka kynhun ban pynbit pynbiang ïa ka prokram jingïalehkai. U la ïathuh ba ka kynhun kaba jop kan ïoh khur ïa ka song pisa ba 1 lak tyngka katba kaba wan ba ar kan ïoh 30 hajar tyngka.
Ha ka 1 tarik Risaw ka jingïalehkai kaba nyngkong kan dei jong ki shynrang hapdeng ka Young Guns pyrshah ïa ka Spark Junior ha ka por 10 baje mynstep katba ha ka liang ki kynthei ka Sister Hood pyrshah ïa ka Tylli Kawei ha ka por 11 baje.
