Shillong, Jymmang, 20: Ka Kashari ha ka sngi Saitjaiñ ka la aibor ïa ki Pulit ban set along haduh san sngi ïa ki san ngut ki bar jylla kiba donkti ban shoh pynmynsaw ïa ki arngut ki nongñiah taksi ha Khyndai Lad ha ka janmiet sngi Palei mynta ka taiew.
U Heh Pulit u la ong ba ka Kashari ka la ai bor san sngi ban set ha along ki Pulit ïa ki san khnang ba kin ïoh pynlong ïa ka jingtohkit kaba bniah.
Ha ka por mynstep, ki nongñiah taksi kiba don hapoh ka shatri jong ka East Khasi Hills Local Taxi Welfare Association (EKHLTWA) kiba dap da ka jingartatien hadien ba ki lad pathai khubor ki la pynmih ïa ka khubor bad ka dur ba la kah ïa ki durkhmat ïa kiba la phah da u Superintendent of Police (SP) ka East Khasi Hills, ha ka ka sngi Saitjaiñ ki la tur sha Shillong Sadar Police Station ban dawa ïa ki Pulit ba kin pyni ïa ka dur jong ki san ngut ki bar jylla kiba la shah kem.
Ka la mih ruh ka jingkylli ba balei ki Pulit ki kah ïa ki durkhmat jong kine ki san ngut ki bar jylla kiba la shah kem.
Na ka liang jong ki Pulit ki la pyntip ruh sha ki nongïalam jong ka EKHLTWA ba ki Pulit kin ym lah satia ban pyni ïa ka dur jong kiba la shah kem hynrei tang hapoh ka Kashari.
