San snem duna ki ïa kyrsum lang ha MDA da la jan kut ka samoi pat ki beiñ kylla – Congress

Shillong, Jylliew 05 : U nongïalam ka Congress ba dei ruh u MDC ka Mylliem, Bah Ronnie V Lyngdoh u la pynpaw ka jinglyngoh ban ïohi ïa ki party riewlum kiba ha ki saw snem tam ki ïaroh ïa ka sorkar MDA hynrei mynta pat ynda la jan elekshon ki sdang sa ka beiñ kylla.
Haba kren bad ki lad pathai khubor hadien ka final football ha Mylliem, u Bah Ronnie u la ong, “San snem duna phi la kyrsum lang ha ka jyrsieh mynta pat phi pyrshang ban kynnoh ïa kiwei. Lada phi sngew kumta kumba ong ka UDP ba tieng President’s Rule hynrei lada ka poi haduh uta u pud ba ki paidbah ki jynjar ka la bha ba wan President’s Rule balei phi tieng.”
Shuh shuh utei u nongmihkhmat uba dei ruh u Myntri barim ka sorkar jylla u ong ruh ba katei ka jingkren ki heh UDP kadei tang ban shu ai daw khlem nongrim.
“Kane ka paw ba ki nongïalam ka Party bad ki MLA kim don ka jingsngewthuh jingmut. Te ki tieng lada ki kwah ban weng na ka sorkar ki MLA pat kim treh. Nga tharai kadei kata kumta ki la shu tap eitmiaw noh ïoh ka wan ka President’s Rule,” bynrap shuh shuh u Bah Ronnie.
Nalorkata u ong ruh ba mynta ha ka sorkar jylla ki don 48 ngut ki MLA kumta lada ka UDP kaba don 9 ngut ka weng noh, ka sorkar ka dang skhem namar ka don sa 39 ngut.
“Lada mih noh ki 9ngut ka sorkar kam pat khyllem. Kumta lada ki kwah shisha ban leh ki la dei ban pynpaw naduh shisnem ba ki thaw lang ïa ka sorkar. Hynrei mynta ba la jan kut ka samoi phin kyntait ba phi khlem don bynta, ” ong u Bah Ronnie da kaba bynrap ba ki UDP ki dei ban kynmaw ba kim lah satia ban thet kti ha baroh ki rukom treikam jong kane ka sorkar.
U la ong ruh ba ki paidbah ki dei kiba la stad bad kin sa bishar bad ai ka rai ha u 2023.