Shillong, Nailur 11: Katba ka ilekshon sha ka ïing dorbar thaw aiñ ka jylla ka la nang jan nang jan ka jingphet ban kynriah party jong ki MLA ruh ka la nangthnem. Ha ka sngi Saitjaiñ la ïohi ba ka jingwan shim bynta ki saw ngut ki MLA na kiwei pat ki seng ba kynthup ïa u Bah Mayaralborn Syiem MLA Congress na Nongpoh, u Bah Renikton Lyngdoh Tongkhar MLA HSPDP na Mawkyrwat, u Bah Shitlang Pale MLA ka AITC na Shangpung bad u MLA khlem seng ba mih khmat ïa ka Nongkrem u Bah Lambor Malngiang sha ka lyngkhuh snem jong ka seng UDP ka la paw shai ba kine ki MLA kin ïakhun noh na ka seng UDP ha ka ilekshon MLA ha u snem 2023 khlem da kheiñ shuh ïa u Samuel M Sangma uba la pynïasoh kum u dkhot pynap(associate member) sha ka UDP naduh u snem 2018 hadien ba u la jop kum u MLA khlem seng..
U MLA ka Mawkyrwat u Bah Renikton Lyngdoh ha ka sngi Saitjaiñ haba kren sha ki lad pathai khubor u la pynpaw ba un ïakhun na kane ka sng bad ban ieh noh pat ïa ka seng HSPDP kaba u la jop ïa ka ilekshon ha u snem 2018 ha kaba u la ong ruh ba um shym la haram ïa ka HSPDP hynrei dei ka jingdonkam ba un ïakhun noh ban pynkhlaiñ ïa ka seng UDP.
U Bah Lambor Malngiang ruh u la pynthikna ruh un ïakhun na ka UDP bad shen hi na ka liang jong u ruh un leit rung sha kane ka seng shen ban pan tiket ha kaba u ruh u la kam ba ka dei ka jingsdonkam bnan ïoh synshar da ka seng riewlum ïa ka jylla hadien ka ilekhson 2023.
La ïohi ruh ba nalor kitei ar ka UDP kan sa ïoh shuh sa ïa u MLA ka seng AITC u Ma Shitlang Pale uba la jop na ka tiket Congress ha u snem 2013 hynrei uba la ryngkoh lang noh pat ha ka jingïalam u Dr Mukul Sangma lem bad ki 10 ngut ki MLA sha ka AITC ha 25 tarik Naiwieng 2022.
U Bah Mayralborn Syiem MLA ba la shah suspend ka Congress ruh la thikna ba un ïakhun noh na ka UDP hadien ba ka seng Congress kaba u la jop na ka tiket jong ka ka la besh shipor namar ka rai jong u ryngkat ki 5 ngut ki MLA ban kyrshan ïa ka sorkar MDA ba la ïalam da u Conrad Sangma.
Nalor u Bah Mayralborn la thikna ruh ba u Bah Process T Sawkmie MLA ba shah suspend ka Congress wat la um poi sha ka jingïalang ha ka sngi Saitjaiñ hynrei u la kren thikna ba un aireng na ka UDP ha kaba ha kine ki khyndiat sngi la sakhi u la leit shim bynta sha ka jingïalang ka UDP bad pynbna ïa kane ka rai ban ïakhun na ka UDP.
