Nongstoiñ, K’lyngkot, 30: San ngut ki kyrtong ïakhun elekshon MDC sha ka Iingdorbar Thawaiñ jong ka Khasi Hills Autonomous District Council (KHADC) na ki Constituency kiba hap hapoh ka West Khasi Hills District ki la thep kyrteng ha ka sngi Palei.
Kine ki san ngut ki kynthup ïa u Bah G. Ningstar Myrthong uba ïakhun na ka tiket jong ka Indian National Congress (INC) na ka Nongstoiñ Constituency, lai ngut ki kyrtong jong ka Voice of the People Party (VPP) ba kynthup ïa u Bah Birbor Riangtem na Mawshynrut Constituency, u Bah Bony Lyngdoh Lyngkhoi na Rambrai Jyrngam Constituency bad u Bah Juristman Ïawphniaw na Nongstoiñ Constituency. Uwei pat u dei u Bah Dressar Marngar uba la ïakhun na ka tiket jong ka National People’s Party (NPP) na Nongstoiñ Constituency.
U Bah G.. Ningstar haba ïakren bad ki lad pathai khubor, u la ong ba ka jingmih jong u ban aireng ha kane ka elekshon ka long namarba u ïohi ba ka jingtrei kam jong ka District Council ha kine ki snem ka la synjor palat. “Lada ki paitbah ki ai ka jingkyrshan ba pura ban pynjop un pyrshang katba lah ban pynbha pat ïa ka jingtreikam hapoh District Council,” u la ong.
U la pynpaw ruh ba ka jingangnud jong u ka long kumno ban pynshkhem shuh shuh ïa ka Sixth Schedule bad ban pynbha shuh shuh ïa ka. U la ong ruh ba ha ka jingïohi jong u ka Sixth Schedule ka long kaba donkam eh namarba ka jaitbynriew Khasi ka dang dei ka jaitbynriew kaba ritpaid kumta ka donkam ban nang pynkhlañ shuh shuh ïa ki kyndon jong ka.
Haba kylli, u la ong, kumba ka long mynta ki paitbah hapoh ka Nongstoiñ Constituency bad ha ka jylla ki dang don ka jingieit ba kyrpang ïa ka Congress khamtam eh ki paitbah jong ka Nongstoiñ Constituency kiba u ju ïakynduh na ka por sha ka por ha kiba bun ki kam.
