Nongstoiñ,K’lyngkot 31: Mynta ka sngi thohdieng ka 31 tarik Kyllalyngkot ki kyrtong MDC kiba la leit ban thep kyrteng hakhmat ki ERO na ka bynta ban ïa aireng ha kane ka election MDC ka ban sa long ha ka 21 tarik u bnai ban wan ki la poi haduh san ngut.
Kitei ki kyrtong kiba la pyndep ïa ka jingthep kyrteng ki dei ki jong ka HSPDP ba kynthup ïa ka kong Badariti Lyngdoh Nonglait ka kyrtong MDC na ka Nongstoiñ constituency, u bah K.P.Pangñiang na ka Rambrai Jyrngam constituency bad u bah Sraly Rashir na ka Mawshynrut constituency.
Ha ka jingleit thep kyrteng jong kitei ki kyrtong ka HSPDP la synran lang da u bah Methodius Dkhar MLA ka Mawshynrut, ryngkat ki hajar ki paitbah nongkyrshan ban ai mynsiem ïa kitei ki lai ngut ki kyrtong. Kitei ki kyrtong haba ïakren bad ki nongthohkhubor hadien ba ki la dep ban thep kyrteng, ki la pynpaw ïa kajuh ka nongrim ba ka party ka ïeng naduh ba la seng ïa ka.
Ki la ong ruh ba ka nongrim jong ka HSPDP naduh ba la seng ïa ka ki long ban ïada ïa ka hok longtrai ha ka khyndew ka shyiap, ban pynneh ïa ka riti ka riti ka dustur jong ka jaitbynriew bad ban ïai pynnsgew sha ka sorkar ba kan pynbha ïa ka Schedule, da kaba weng noh ïa ka kyntien President na ka paragraph 12 A(b) jong ka riti synshar ka ri bad ban tynsat noh da ka ktien Governor, khnang ba ka jingpyntreikam ïa ki kyndon aiñ kiba wan na ka sorkar pdeng kin ym lah shuh ban ïatyngkhuh bad ki aiñ kiba ka District Council ka thaw.
Ha kajuh ka sngi kiwei pat ki kyrtong kiba la leit ban thep kyrteng ki long u bah Bormanding Nonglang kyrtong ka Congress na ka Rambrai jyrngam bad u bah Gardinal Sohshang ka seng NPP na Mawshynrut.
U bah Bormanding Nonglang haba ïakren bad ki nongthoh khubor, u la ong ba kumba ka long mynta ki paitbah jong ka West Khasi Hills bad ka jylla baroh kawei ki ieit bad phai khmat sha ka Congress bad wat la ka dei ka sien ba nyngkong ba u ïeng ban ïa aireng kum u kyrtong MDC u don ka jingkyrmen ba un poi sha ka jingjop namar ki paitbah jog ka constituency ki ai a jingkyrshan ba pura.
Ha kajuh ka snghi u bah Gardinal Sohshang kyrtong ka NPP jong ka Mawshynrut u la pyndep ïa ka jingthep kyrteng bad ha katei ka jingleit thep kyrteng jong u la synran lang da u bah Gigur Myrthong MDC ba mynta, u bah Gabriel Wahlang MLA ka Nongstoiñ, bah Macmilan Byrsat MLA barim ka Nongstoiñ u ba dei ruh u District president ka NPP, u bah Dressar Marngar kyrtong MDC ka NPP jong ka Nongstoiñ ryngkat ki nongkyrshan jong ki.
Ka jingthep kyrteng na ka bynta ka ne ka MDC Election kan bteng biang sa lashai ka sngi saitjaiñ ka 1 tarik Kyllalyngkot. Hynrei ym shym pat la ïoh jingtip satia katno ngut ki kyrtong MDC ki bym pat pyndep ban thep kyrteng.
