Nongstoiñ, Jymmang 23: Namar ka jingud jingnam jong ki paitbah ka Nongstoiñ, u bah Gabriel Wahlang MLA ryngkat ki ophisar jong ka tnad PWD, ba la synran lang da ki nongïalam shnong jong ka Upper New Nongstoiñ ha ka 23 tarik Jymmang, ki la leit ban jurip ïa ka jingkieng ha Phodthre kaba la pyntrei naduh u snem 2003-04, hynrei u kontraktor u ba pyntrei ïa katei ka jingkieng um shym la lah ban pyndep haduh mynta hynrei u la shu iehnoh khongreng la palat 22 snem.
Kum ban pynkynmaw ba katei ka jingkieng, ka dei kaba pynïasoh ïa ka surok na Upper New Nongstoiñ bad ka Tiehsaw bad ka dei ka surok kaba donkam haduh katta katta, namar ki khynnah kiba leit pule ha KJP Synod Higher Secondary skul ki hap ban ïaid lyngba katei ka jingkieng.
Ha kajuh ka sngi u MLA ryngkat ki heh ophisar, ki la leit ban jurip ruh ïa ka surok na Upper New Nongstoiñ haduh Mawkawah bad la lap ba katei ka surok ka la sniew haduh katta katta bad ka la donkam ban pynbha noh.
Utei u nongmihkhmat haba ïakren bad ki nongthoh khubor hadien ba u la dep ban leit jurip ïa kitei ki jaka, u la ong ba na ka bynta ka jingkieng ha Phodthre, ka sorkar ka la dep mang pisa kumba san klur tam, na ka bynta ban shna pyndep ïa katei ka jingkieng bad la dep khot tender ha kaba shen yn sa sdang noh ban pyntrei.
Nalor kata u la ong ba na ka bynta ki surok ha ka thaiñ Nongstoiñ, ka sorkar ka la dep mang kumba ar phew klur tyngka tam bad hapoh une u snem ka sorkar, kan sa khot tender noh na ka bynta ban pyntrei ïa kitei ki surok.
U MLA u la ai khublei ïa ka sorkar ba ka la shimkhia bad ka la sngap ïa ka jingud jingnam jong ki paitbah, khamtam eh na ka bynta ban pyndep noh ban pyntrei ïa ka jingkieng Phodthre, namar lada la dep pyntrei ïa katei ka jingkieng kan ïarap shibun ban pyllait na ka jingdheng kali hapoh sor Nongstoiñ.
