San bnai ym pat thung bujli doktor ha Mawthawpdah PHC, kynduh mawsiang ki paidbah

Mawkyrwat, Lber, 22: Ka long ka jingduhnong kaba khraw na ka bynta ki paidbah nongwan shim dawai na Mawthawpdah Primary Health Centre ha kaba la san bnai ka Sorkar kam shym la phah bujli doktor hapoh ka PHC naduh ba la ka doktor ka la shah pynkynriah kam noh sha Civil Hospital.
Halor kane ka jingeh jong ki paidbah, ki nongïalam jong ka HYC Mawthawpdah Unit ki la leit ban ïakynduh ïa u District Medical & Health Officer (DM&HO) jong ka South West Khasi Hills District ban pynsngew halor kane ka jingeh ba ki paidbah ki ïa kynduh bad halor ka nongrim ba ka Dr. Bakor Nongrum kaba la trei hapoh Mawthawpdah PHC ka la shah pynkynriah kam noh sha Civil Hospital naduh ka 30.10.2024.
Ka Seng ka la pynpaw ba ka dang khmih lynti ba tang hapoh shibnai eiei ladei ban ïoh bujli doktor da kawei hynrei phewse haduh mynta la dap san bnai ym pat shem la thung bujli.
“Kane ka jingleh mynthi ïa ka Mawthawpdah PHC ka la buh jingeh haduh katta katta ïa ki paidbah nongshong shnong jong ka thaiñ”, ong u kyrwoh ba la phah ka HYC bad bynrap, ym tang kata haba bunsien haba ki nongpang ki leit wad dawai ki la hap ban wan phai thylli noh namar ym don doktor.
Ka seng ka la pynkynmaw ba ïa ka Mawthawpdah PHC la plie ba kan ai jingshakri 24×7 bad ai jingshakri ïa palat 31 hajar ngut ki nongshong shnong kumba la dep ban pruiddak hadien ba ka seng ka la leit ïkynduh ïa ka Myntri ka Sorkar Jylla kaba khmih ïa ka tnat ka Koit ka Khiah ka Dr Ampareen Lyngdoh ha ka 13 tarik Jylliew, 2024 ban pynsngew ïa ka jingbym treikam 24×7 jong ka PHC.
Ha ka 26 tarik, Jylliew 2024, ka Dr Ampareen da lade hi ka la leit jngoh ïa ka Mawthawpdah PHC bad ka la lap ïa ka jingshisha ba kam shym la treikam 24×7 bad ym tang kata ka la lap ruh ba ka jingdon ki doktor ruh ka duna. Kumta ha ka 26 tarik, ‘Naitung, 2024 la phah ïa ka Dr. Bakor Nongrum ban shakri ha Mawthawpdah PHC bad ha kito ki por ka la long shisha ka jingkmen ïa ki paidbah jong ka thaiñ bad ka jaka sumar ka la ai shisha ka jingshakri 24×7.
Dei tat ha ka 30 tarik, Risaw, 20224 ka Dr. Bakor Nongrum, ka la shah pynkynriah kam noh sha Civil Hospital Shillong ha kaba haduh mynta la san bnai ei ei ym pat shym la thung bujli bad ka la long ka jingduhnong kaba khraw ïa ki paidbah kiba wan shim dawai na kane ka jaka sumar.
Ka HYC ka la kyrpad ïa ka Sorkar lyngba u DM&HO South West Khasi Hills District ba ka dei ban leh eiei noh kham kloi halor kane ka kam khnang ba kan ym don ka jingthut ha ka jingleit jingwan jong ki paidbah kiba donkam ka jingïarap ha ka liang jong ka jingkoit jingkhiah.