Samla Wanlambok! U Dongmusa u dang sah tdem, ki jingiw-bih kiba thiang jongphi kin khie rasong ban ïeng ka daw

Ka Khasi Students’ Union ka la pynpaw ïa ka jingsngewsih kaba khraw halor ka jingkhlad noh jong u Samla Rangbah Wanlambok Kharsati ha ka 11 Tarik Jylliew 2023.
Ngi pynpaw ïa ka jingsngewlem bad jingsngew diaw kaba khraw haduh katta katta eh ïa kane ka jingjia ba kum ka ïing, phi ïa kynduh. Ngi tip ba kane ka dei ka jingpynïaid jong u Blei u Trai Kynrad Nongbuh Nongthaw, ïa kane ngim lah ban leh eiei namar kum ki briew ngi hap ha ka jing pynïaid kaba stad ka jong u.
Ha kum kane ka khyllipmat kaba kthang bad kaba u lyoh ba dum u wan tap ïa ka ïing ka sem ,ngim don kyntien da kum wei pat,namar u Kynrad nongthaw u tip kham bha halor kiei kiei baroh, hynrei ngin buh ryngkat ha ki jingduwai ba u Blei Trai kynrad un pyntngen pyntngeh, ban sop ban spaiñ pat ïa ki jing pangnud kum ka ïing kaba ïa kynduh kum kine ki jingjia.Un pyndap ïa ka jaka ba thylli,ha kum kane ka por ba u lyoh ba dum u wan kah ïa ka ïing ka sem.
Kum ka Seng ngi kwah ban kyrtiang dien ïa ka jing ïadei hapdeng ka KSU bad U Samla Wanlambok-:
U la ïa soh Nyngkong eh sha ka Seng ha u Snem 2003 kum u Publicity Secretary ka Mawryngkneng Circle bad hadien ba u la bat kum u Publicity Secretary u la shah pynkhamti pat ha sa ïa ka kam kum u General Secretary bad dei hangne u la pyni shisha ïa ka kam ba khraw jong u kum uta u Nongïalam bad dei ha u snem 2009 u la shimti pura kum u Nongïalam ba Rangbah jong ka Mawryngkneng bad dei ha kane ka por lah paw shynna ka Sap Nongïalam ha kaba u la long shisha u Samla ba shemphang bad uba don ïa ka Jingkit khlieh ban tynrong lem ïa ka khia ka shon jong ka imlang sahlang bad ïa ka Jaidbynriew hi baroh kawei.
Ym tang katta u Samla Wanlambok hadien ba u la Pule ïa ka MSc. Chemistry Hapoh ka Skul bah NEHU u la shimti ruh kum u President ka KSU NEHU ban ïalam ïa ka kynhun ki Samla pule Khasi ha katei ka por bad kum u Nongïalam jong ka KSU NEHU Unit u la trei bor bah ban ïoh pynrung klas ïa ki Samla khasi . Ka matti kaba ngim lah ban klet ïa u Samla Wanlambok ha kane ka por ka long ba ki la lah ban ïa khun da ka bor jabieng pyrshah ïa ki bor pynïaid ka Skul bah NEHU ka long ba ïa ki Hostel ba la tei Thymmai ladei ban ai nam ai sha ka Kyrteng Khasi bad kane ka la long kaba jop.
Ka Jingtbit, ka jingshemphang bad ka jinglen lade jong u Samla Wanlambok kam shym la kut noh tang hapoh ka Shnong kaba u shong u Sah kam shym la kut ruh tang ha ki Saw kynroh ka Skul Bah NEHU. Ka KSU Central Executive Council hapoh ka jingïalam jong u Bah Samuel B.Jyrwa President bad bah Hamletson Dohling General Secretary ka la I bit ïa une u Samla bad ka la Pynrung dkhot pura ïa u ha ka CEC ha u Snem 2008 tad haduh ba un da shongthait na ka seng ha u Snem 2017. Kaba kham sngewtynnad ïa une u Samla ka long ba wat haba u la shongthait na ka Seng hynrei pat u don beit ha syndah tad haduh kane ka khyllipmat ba u Blei un shim noh sha lade.
Kumta kum ka Seng ngi dang sngew kit-ram da shisha ban duh kloi noh kum ïa une u Rangphawar uba ju kren beit ïa ka hok bad ka jingshisha na bynta ka bit ka biang u paid shi tyllup ka Ri u Laiphew Syiem Khad Ar Daloi. Ngi dang khmih lynti ba ngin dang lah ban ïai pyn tyllun ïa ki Shalyntem ka Jaidbynriew ryngkat bad une u Samla Rangbah phewse u Blei ym shym la i bit shuh ban dang pyn shong pynsah ha kane ka Ri Shong Pdeng Pyrthei.
Bah Wanlam, Ki Symboh ummat sngewnguh kim shym pat biang ban pyn ïa hap tara ryngkat ki rngi ba tyngshaiñ tam ba phi la noh ha ki mawjam ka jingim jong phi, u bym lut ne jah noh na u thiar ka khana pateng ka jaidbynriew, ïa u ba phi la sdang la ïalam bad buh ha ngi ki longdien , ki symbai ba phi la bet kin nang ïai ithuh paw bad ïai saiñdur bad tyngshaiñ ha ki syrdeng ki tympan sur pring jong ki lyngwiar jingieid pynsyaid mynsiem ki Rympei Khasi. Ki mawpun bad ki kyrdon ka lynti ba phi lam shaduh tyngkhong ïing ka sngi ka jingjop kin pynsah ïa ka Maïa bad yn ïai kynmaw pateng la pateng katba ka sngi ka dang shat ha u Lum Shyllong.
U Dongmusa u dang sah tdem, ki jingiw-bih kiba thiang jongphi ba la noh ryngkat ka dohnud kin khie rasong ban ïeng ka daw ka jutang hakhmat ka pyrthei kumba phi la theh lut khait ïala ki sap bad ki snap ki bym lah pyndam shuh.
Phi la khlad hynrei phim shym lah ieh pat shadien, phi la sei pat ïa ki ba bun ki Rangphawar ha madan siat thong ban thaw ïa ki sur jingrwai ban kynrsiew ïa ka mynsiem thiah ïa la ki para ri, ban kit ban bah khnang ba ka Ri Jong ngi kan ïai ksan haka hok bad ki jingshisha.
Ha ka kyntang ïawai, kum ka seng Ngi phah ryngkat ka Duwai ka phirat ban phin leit suk leit sain, bad to nang ïai kyrkhu ha lynti Ïaid jong ngi na bynta ban tei ïa ka Bha- ka Miat ka trep u Hynñiew skum.
Ngi phah ruh ka kyrwoh sngewlem sha ki ba ieid thep mynsiem,ki ba ha ïing ha sem,ki kur ki Kha ki man ki lok ki jor baroh, ngi ngeit skhem ba u Blei Trai Kynrad un nang ïai pyntngen ïa phi ha ryngkat ka kyrkhu kyrdoh kyrpang ïa phi kiba ha ïing ha sem, kiba la ri la sumar ïa ka ha ki sngi ki por baroh. Ngim don eiei ban ai hynrei tang kum ka dak sngewlem na bynta jong phi, ngeit phin pdiang ïa kane.
Leit Suk Sha Dwar u Blei bad Shong jah thait junom la junom ha ka jaka ba Nongthaw u la pynkhreh bad Dang ïai jngoh arsut ïa ka Jaidbynriew ba kan dang ïai kiew irat. Ngin ïai Pyrto ïa u Synñiang u bynhei ba phi la noh sha ka Imlang Sahlang bad ka Jaidbynriew.