Samla to long ki nongwanrah jingkylla ha ka Balang, ha ka Ri bad ha ka Pyrthei : Conrad

Shillong, Risaw 05 : U Myntri Rangbah ka Jylla, Conrad K Sangma u la kyntu ïa ki samla kiba poi sha ka jingrakhe ïa ka Jubili Rupa jong ka Indian Catholic Youth Movement kaba long ha Divine Retreat Centre ha Kerala ha kane ka sngi U Blei, ba ki dei ban long ki nongwanrah jingkylla ha ka Balang, ha ka Ri bad kumjuh ha ka pyrthei hi baroh kawei.
Da kaba ai khublei ïa ka ICYM ha ka jingrakhe ïa ka jingïaid lynti jong ka ICYM ha kine ki 25 snem, u Myntri Rangbah u la ong, “Nga kyntu ïa ki samla ba kin long ki nongwanrah jingkylla ha ka Balang, ha ka Ri bad ha ka pyrthei hi baroh kawei.”
Haba kren ha kane ka sngi pynhap pyrda ïa kane ka sngi khraw jong ki samla Katholik, u Myntri Rangbah u la ong ruh ba ki samla ki dei ruh ban long kum ki sharak jong ka jingkyrmen bad ruh ban ieng rangbah haba ki kynduh ïa ki jingeh bad khamtam eh ban pyndonkam hok ïa ka rynsan ba ki ïoh.
Shuh shuh u la kyntu ruh ïa ki ba kin long kum ka jingkieng ba pynïasoh bad wanrah ïa ka mynsiem jong ka jingïatylli bad ka mynsiem riewshlur.
“Ai ba kane ka Jubili kan long kum ka ding ban pynrhem ïa ka mynsiem jong phi, bad ba ki jingeh kin pynphrang shuh shuh ïa ka thong jong phi. Ïalam da ka jingshlur, ka mynsiem shakri da ka jingsngewrit bad tyngshain da ka jingshai u Khrist,” la kyntu shuh shuh u Myntri Rangbah.
Ha kajuh ka por u kyntu ruh ïa ki samla ba kin pyndonkam ïa kane ka juk digital ban ïatei ym ban pynpra. U la kyntu ruh ïa ki ba kin phaikhmat sha ka sengkam lajong ban kyntiew ïa kiba duna ha ka ïoh ka kot.
U Cardinal Felipe jong ka Goa, ba dei ruh u President jong ka Conference of Catholic Bishops of India (CCBI) u la long u Kongsan ha ka jingknia ha ka Mass Bakhuid.