Sam u MLA ka Umroi 32 tylli ‘Work Order’ sha ki shnong ryngkat ki tin sop ïing sha ki 615 ïing

Nongpoh, Ïaïong: U MLA jong ka Umroi Constituency Bah Damanbait Lamare u la sdang ban sam ïa ki kam pynroi sha bun tylli ki shnong kiba hap ha Umroi Constituency da kaba aiti 32 tylli ki ‘Work Order’ sha ki shnong bapher bapher kynthup ruh ïa ki tin sop ïing sha ki 615 tylli ki longïing na ki 83 tylli ki shnong kiba hap ha ka Umroi Constituency.
Ïa ki tin sop ïing la sam sha ki shnong na ka bynta kito ki longïing kiba donkam shisha ka jingïarap bad ha kaba ïa dei bad ki Work Order ki kynthup ïa ki kam pynroi ban shna naduh ki lynti ïaid kjat, ki ïing dorbar, ki ophis ki seng longkmie, ki ophis seng Khasi bad kiwei kiwei.
Haba kren halor ki kam pynroi, u Bah Damanbait Lamare u la ong ba kum u nongmihkhmat u la pyrshang ban trei shitom katlah katïai ban pynïoh ïa ki kam pynroi sha man la ki shnong bad ki longïing badonkam ïa ka jingïarap bad dei namar kane ka daw u la sdang ban sam ïa kitei ki kam pynroi khnang ba ki shnong ki thaw bad ki longïing kin ïoh shisha ka jingmyntoi lyngba kine ki kam pynroi ba la wan rah ma u kum uta u Nongmihkhmat paidbah.
U la bynrap ruh da kaba ong, kumba ki paidbah ki la bynshet ïa kane ka lyngkor nongmihkhmat un sa dang trei shitom nangne shakhmat ban dang pynïoh ïa shibun ki kam pynroi hapoh ka Constituency bad lada wan kita ki kam pynroi ka jingmyntoi kan long shisha na ka bynta ki paidbah nongshong shnong ka Umroi Constituency.