Jowai, Naitung 5: U MLA ka 2-Jowai Constituency ma Wailadmiki Shylla mynta ka sngi ula sam ïa ka skim ‘Special Rural Works Programme’ (SRWP) jong u snem 2019-2020 sha ki 406 ngut ki nongïoh myntoi hapoh ka sor Jowai ïa kaba la pynlong ha Thadlaboh Community Hall.
Ïa kane ka skim la sam kyrpang da u MLA sha kitei ki 406 ngut lyngba ka Cheque kaba long mar 10,000 (shiphew) hajar tyngka marwei da kaba pynrung ïa ka pisa hapoh ki Bank Account jong ki.
Hashwa kane la don ka jingïalang ba lyngkot ba la pynïaid da u ma O. Lamin Nominated MDC, ha ryngkat ka jingdonlang ki MDC naduh u ma Brightstar Chyrmang MDC uba la ai ki kyntien pdiang, ma Ailad Bhoi MDC, ma Lakhon Dkhar MDC, ma Ebormi Lyngdoh District President, ma Lasoo ki Lakiang Waheh Shnong Ladthadlaboh, ma Abul Phawa Waheh Shnong Mihmyntdu, u General Secretary (NPP) ka District ma Donbok Jana nalor kiwei de.
U ma Wailadmiki haba ai jingkren ula pynsngew kat ka bor ula pyrshang ban pynïoh jingïarap salonsar sha baroh ki nongïoh myntoi kiba dei ruh ki nongkyrshan jong u hapoh ka Constituency. Ula ong wat ha kine ki ar snem kiba la leit naka daw jong ka khlam Covid-19 kaba la wanrah ruh ka jingeh ban sam ïa ki skim paidbah, hynrei dei hadien jong ka khlam la lah ban sdang noh ïa kane ka jingsam ïa ka skim MLA.
Shuh shuh ula pyntip ba na ka skim MLA ka dang sah sa lai snem ka pisa bad u kyrmen ba un sa lah ban sam pyndep noh hapoh kine ki sngi ban wan sha baroh kito kiba dei hok ban ïoh.
Ka rukom sam skim ka long kaba ïapher lada ïanujor ha nongkyndong bad ha sor, hynrei lyngba ka ‘Jowai Development Committee’ jong u MLA kala pynbeit ban sam jingïarap ha sor da ka pisa khnang ba kin ïoh ban pyndonkam ha ki kam bapher bapher, ym kumba leh ha nongkyndong ha kaba u MLA ula dep sam da ki tin ïing bad kiwei de ki tiar donkam.
