Jowai, Ïaïong 25: U MLA ka Raliang Con-stituency ma Comingone Ymbon mynta ka sngi ula sam ïa ka pisa (cheque) kaba kot sha ka 1.18 klur tyngka sha ki 175 ki kynhun nongrep hapoh ka Laskeiñ C&RD Block, ha ka jingïalang ba la pynlong da ka Meghalaya Basin Management Agency (MBMA) ha madan Moosyiem, Shangpung West Jaiñtia Hills District.
Haba ai jingkren ha kane ka sngi u ma Comingone Ymbon ula ai mynsiem ïa ki nongrep ka thaiñ ba kin pyndonkam hok ïa katei ka jingïarap pisa kaba ki la ioh lyngba ka sorkar, khnang ba kin nang lah ban pynïar shuh shuh ïa ka kam rep kam riang.
Ula pyntip ruh ba ka sorkar lyngba kane ka prokram ‘FOCUS’ kala long ka lad jingïarap kaba khraw eh ïa ki nongrep ha kiba bun ki liang, da kaba ula kyntu jur ïa ki longkpa kumjuh maki ruh ki lah ban shim ïa kane ka skim jingïarap na ka bynta ban seng ïa ki kynhun jong ki.
Ula pynsngew ruh shaphang ki kam ba ki Self-Help Group kila noh synniang hapoh ka imlang ka sahlang bad lyngba jong ki kala wanrah shibun ki jingmyntoi bad ki jingkylla naduh ka jingkhuid jingsuba bad kiwei de.
Shuh shuh ula ai jingkren halor ka jingeh kaba mih na ki ñiut ïa kaba la buh jingeh shisha ïa ka sorkar haduh katta katta ban leit bret ïa ki ñiut namar ka jingpyrshah jong kiba bun ba lang na ki shnong ki thaw hapoh ka District.
Ha kaba ïadei bad kane ka jingeh u khot ïa ki paidbah ba kin ïatreilang da ka jingïasngewthuh jingmut lang bad ka sorkar, khnang ba yn lah ban tehlakam ïa kane ka jingeh hapoh ka District bad ban ïoh noh ïa ka jaka bret ñiut kaba biang eh.
Katba na ka liang u Dr. D.I Kjam, District officer A.H & Veterinary, Jowai ha ka jingkren ula ai mynsiem ïa ki nongrep ka thaiñ ba kin shim ïa kane ka kabu ba la ai da ka sorkar lyngba ka FOCUS, kaba long ruh kum ka lad ban ïeng hala ki jong ki kjat ban seng ïa ki kam ka jam.
Ula pyntip ruh ba ka sorkar lyngba ka tnad A.H & Veterinary kala pynkhreh ïa ki lad jingïarap ban ai ram (loan) khlem don ka Interest ïa kino kino ki Cooperative Society kiba wan shakhmat ban pynrung kyrteng ïalade kum ki ‘Piggery Society lane Multipurpose Society’. Na ka liang ka tnad Veterinary ruh ka long kaba kloi ban ïatreilang bad ki nongrep ha kano kano ka por ba ki donkam, la ong u Dr. Kjam.
Kiwei de kiba la ai jingkren ki long ka kong D. D Syngai, Additional Deputy Commissione, bad u DPO of Planning Branch, Jowai, katba ïa ki kyntien ai khublei la ïoh na u ma Sywell Lyngdoh, District Project Manager, District Basin Development Unit, Jowai.
