Khliehriat Jylliew 07 : Ka Jaiñtia National Council-Khliehriat Circle hynnin ka sngi kaba dei ka sngi pynneh mariang ne ka world Environment Day, hapoh ka jingïalam u President jong ka Circle, u bah Shanborlang Bamon ka la pynlong ïa ka prokram thung dieng bad pynlong ruh ïa ka prokram jingpynshai paidbah ban pynsngewthuh ïa ki paidbah halor ka jingdonkam ban ïada bad ban sumar ïa ka mei mariang.
Kumba la buh ha ka phang pdeng jong kane ka jingrakhe World Environment Day “Beat plastic Pollution” bad kum shi bynta ban kyntiew ïa ka khuid ka suba, ka seng ka la ioh ban shim bynta ha kiba bun ki liang ba kynthup ka jingpynkhuid ïa ki jaka paidbah kiba dap da ki ñiut, ki bilor, ki plastic, ka seng ka la sam ruh ïa ki tim pynlang ñiut ne ki dustbins sha ki dong bapher bapher ha shnong Khliehriat.
Ka seng ka kyntu ruh ïa ki paidbah ban pynduna ïa ka jingbret pathar ïa ki jaboh khamtam ki plastic,
Ka JNC Khliehriat Circle, ka pynkynmaw ruh ba ka long kaba donkam ban don ka jingïatrei lang ha ka ban pynneh pynsah ïa ka mariang ba kup rong jyrngam bad pynneh pynsah ïa ki jingdon jingem kiba don ha ka mariang sawdong.
“Ki wah, ki lum bad ki khlaw ki long ka spah tynrai bala ai ha ngi bad ka jingkitkhlieh jong ngi mynta ka long ba kumno ban ïada bad ban pynneh ïa ki khnang ba kan long ka jingmyntoi ïa ngi hi, to kane ka sngi pynneh mariang kan ai mynsiem ïa ngi ha kaba ngin nang lah shuh shuh ban shim khia ban ïada ïa ka mariang jong ngi,” ong u kyrwoh na ka JNC Khliehriat Circle.
Ka seng ka pynpaw ruh ïa ka jingsngewnguh ïa ki paidbah, ki volunteer shnong Khliehriat bad ki nongkyrshan kiba la wan ban ïa shim bynta lang ha kane ka sngi ha kaba pynkhuid bad thung dieng ha shnong ha thaw bad ka la pynpaw ruh ïa ka jingkut jingmut ban bteng shuh shuh ïa ia ki kam ai jingpynshai namar da ka jingiatreilang ban pynneh ïa ka mariang ha ka rukom kaba dei bad ruh ha ka rukom trei hok.
“Ka World Environment Day, kaba la rakhe man la u snem ha ka 5 tarik jylliew ha kylleng ka pyrthei, ka pynkynmaw ïa ngi baroh ïa ka jingdonkam ban sumar bad ban burom ïa ka mariang, ka jingïatreilang kum ha kane ka sngi ha ka jylla jong ngi ka long ka nuksa ban kyntiew ïa ka jingsngewthuh ki paidbah halor ka jingkordor jong ka mariang” Pynkut u kyrwoh na ka JNC Khliehriat Circle.
