Jowai, Jymmang 04: Ka Myntdu Pynthorneiñ Farmers Welfare & Producers Organization (MFW&PO) ha ryngkat ka jingtreilang bad ka Central Agriculture University- CPGS, Umroi Ri-Bhoi District, kila pynlong ïa ka prokram pynsngewthuh shaphang ka rukom rep ïa u kba CAU R1 ha ïing Dorbar jong ka shnong Sohmynting.
Ka jingrep ïa une u synbai kba CAU R1 ka lah ban pynïoh khambun u kba, ïa kito ki nongrep kiba la pyndonkam ïa u kum ha Myntdu Pynthorneiñ, ha Mukhla, Myntdu Pynthorwah namar utei u kba ulong uba sei soh bha wad la ha ka por ba jur u slap bad beh ka lyer.
Ha kane ka sngi na ka liang u Dr K.N Singh bad u Dr M. Pathak na ka CAU – CPGS, Umiam Ri Bhoi District, kila sam ïa utei u synbai kba CAU R1 sha ki 24 ngut ki nongrep jong ka Sohmynting, ki nongrep hadien ba la ïoh ïa une u kba kin hap ban thad bha ïa u bad kin hap ruh ban buh symbai na ka bynta ka snem ban wan bad ban ïoh sam kylliang sha kiwei de ki nongrep.
U ma J. Pyrtuh u PA Dolloi ka Elaka Amwi – Sohmynting uba la pynïaid ïa ka jingïalang ula pynpaw ka jingsngewnguh ïa ki Scientist ka CAU-CPGS, kiba la wan rah ïa utei u synbai kba CAU R1 sha ki nongrep ka thaiñ.
Katba na ka liang u ma Khroo L Pariat uba la wan rah nyngkong ïa une u synbai kba na ka CAU Umiam, Ri-Bhoi District naka bynta ban rep shapoh kine ki thaiñ ka la long shisha ka jingmyntoi ïa ki nongrep kumjuh ka jingbha ki hali ki pator ha ka rep ka riang.
Kiwei de kiba ai jingkren sha ki nongrep ki kynthup ïa u Dr KN Singh u nonglap ïa une u kba CAU R1, kumjuh na u Dr M Pathak uba la batai shaphang ki lad jingïada na ka rukom shah pynjulor ki jhur bad u kba ha ki khñiang, katba u ma Jurbha Phawa uba pynsngew shaphang ka rukom rep ïa u kba CAU R1 naduh u snem 2019 ha Myntdu Pynthorneiñ.
