Jowai, Nohprah 10: Ka Krishi Vigyan Kendra (KVK), Jaiñtia Hills mynta ka sngi 10 tarik u Nohprah kala pynlong ïa ka prokram ai jinghikai bad sam ïa ki symbai Phan sha ki nongrep ka District haka jingïalang ba long ha ophis treikam jong ka.
La sdang ïa ka prokram da ka jingkren pdiang burom na u bah M.Kharbuli, Farm Manager, uba la ai khublei ïa baroh ki nongïashim bynta ha kane ka prokram, ula krem ruh shaphang ka ICAR-Indian Agricultural Research Institute (IARI), New Delhi, da kaba u kdew ba ïa kine ki symbai phan la pynïoh da ka jingkyrshan ka ICAR-IARI hapoh ka NEH Programme.
Na ka liang ka kongsan kong S.Kynjing kaba dei ka District Horticulture Officer (DHO), West Jaiñtia Hills District, ha ka jingkren kala kubur ïa ka jingtrei shitom jong ka KVK ha kaba kyrshan borbha ïa ki nongrep bad kyntu ruh ïa ki paid nongrep ba kin shim kabu lyngba ki lad jingtip kiba la ïoh na kane ka Prokram, ha ka juh ka por kala pynshlur ïa ki nongrep ban shim ïa ka rukom rep Phan kaba long katkum ka juk science.
La ïoh ruh ïa ka jingkren lyngkot na u ma S Lamare, Chairman ka shnong Wahiajer bad u la pynpaw ïa ka jingsngewnguh kaba khraw ïa ka ophis jong ka KVK kaba la kloi ban ai jingkyrshan bad kyntiew ïa ka kam rep kam riang.
Ka kong B. Kharbamon, Subject Matter Specialist (Horticulture) kala ai ïa ka technical session halor ka rukom pynmih ïa u phan, ka lad jingïada ban lait na ki khniang jingpang ha u phan bad ka rukom buh bha ïa ki symbai.
La pynkut ïa kane ka prokram da ka jingai khublei na ka kong Larika L Challam, Senior Scientist & Head, KVK Jaiñtia Hills bad ka la ai mynsiem ïa ki nongrep ba kin pynneh pynsah ïa ki symbai na ka bynta ka aiom ban wan khnang ban pynduna ïa ka jingshañiah na kiba nabar bad kan kyntiew ruh ïa ka jinglah ban pyndap bam ïalade.
Hadien kane ka prokram la sam ruh ïa ki symbai phan sha baroh ki 108 ngut ki nongïashim bynta ha kane ka prokram.
