Shillong, Jylliew, 24: U MLA jong ka Rangsakona Constituency u Zenith M. Sangma ha ka sngi Palei u la sam jingïarap da ki marbam sha ki 900 tylli ki longiing jong ki 11 tylli ki shnong kiba hap hapoh ka Rangsakona Constituency hadien ba ki la shah ktah na ka jingshlei um ha kine ki khyndiat sngi ba la leit noh.
Ïa u Zenith Sangma uba dei ruh u Vice President jong ka All India Trinamool Congress, Meghalaya Unit la synran lang da ki dkhot jong ka Meghalaya Trinamool Congress, Zenith Sangma.
Ka rilum Garo ka dei ka thaiñ kaba la shah ktah bad shah lynshop tyngeh ha ka jingshlei um bad na ki jingtwa khyndew.
Bun tylli ki jingtwa khyndew ki la jia ha rilum Garo ha ka jingther u lapbah uba jur kat haduh ba katto katne ki mynsiem briew ki la duhei ïa la ka jong ka jingim.
Dang ha kine ki shi sngi ar sngi, u Myntri Rangbah ka Jylla u Conrad Sangma u la hiar jurip hi dalade ïa kine ki jinglynshop jong ki bor ka mariang kaba la wanrah ïa ka jingjulor kaba shyrkhei hapoh rilum Garo.
U Myntri Rangbah u la pyntip ruh ba ka Sorkar Jylla ka la pan jingïarap pisa 300 klur na ka Sorkar Pdeng na ka bynta ban tei biang ïa ki jingshah pynjulor bad ban ai jingïarap sha ki lanot kiba la shah ktah ha kine ki jingjia ha rilum Khasi-Jaiñtia bad Garo.
