Shillong, Iaiong 30 : Da ki spah ngut ki nongri ngap ha ka thaiñ Mawkynrew ha ka 29 tarik u Ïaiong, ki la ïoh pdiang jingmyntoi da ki ksing ri ngap na u MLA ka Mawkynrew Constituency, Bah Banteidor Lyngdoh uba dei ruh u Myntri Sorkar Jylla ha ka jingïalang kaba la long ha Thangsning ha ka 29 tarik u Ïaiong, 2022.
Kane ka jingsam ksing ka la long ruh shi bynta na ka prokram ai jinghikai ïa ka rukom ri ngap lyngba ka Apiculture Mission II ba la pynlong da ka ophis u General Manager, District Commerce and Industries Centre, Shillong of Commerce and Industries Department ha ka jingïatreilang bad ka tnad Horticulture.
Ha kane ka sngi nalor u Bah Banteidor la ïa donlang da i Kong D Kharjana, Deputy Director DCIC, u Bah KB Lakiang, DHO East Khasi Hills, u Bah Bah Bashongdor Syiem, Nodal Officer Apiculture Mission II, u Bah Bah S Passah, Functional Manager DCIC, u Bah Letswell Kharumnuid, Sordar ka Shnong Thangsning, ka kong Amanda Pakyntein, kurim u Bah Banteidor nalor kiwei pat.
U Bah Banteidor haba kren kum u kongsan u la ong ba ka ngap kaba mih na ki shnong bapher ka thaiñ Mawkynrew ka dei kaba biang bha. “Ngin wanrah ïa ka Processing Unit bad ka Processing Centre ha kaba yn pynbiang pynbit bad thep bha ïa ka um ngap ha ki bilor kiba don ryngkat ki kyrteng jong ki kynhun ri ngap”, la ong u Bah Banteidor.
