Sam khusnam ka BMC Thadlaskeiñ sha ki skul ba jop ha ka jingïaid rally pyrshah dih duma

Jowai, Jymmang 31: Ka ophis jong ka Block Mission Coordinator, Thadlaskeiñ ha ryngkat ka jingiatreilang bad ka District Mission Coordinator, SSA-SEMAM West Jaiñtia Hills hynnin ka sngi kila pynlong da ka jingsam ïa ki khusnam sha ki skul kiba jop ha ka jingïaid rally pyrshah dih duma ne ka ‘Rally Against Tobacco & Signature Campaign’.
Ha kane ka jingïaid rally la wan ban ïashim bynta da ki skul bapher bapher jong ki lai tylli ki Block hapoh ka District shi bynta na ka thong jong ka ‘World No Tobacco Day 2022’.
Hashwa ban sam ïa ki khusnam la don ka jingïalang ba lyngkot ba ka pynïaid da ka kong C. Lyngdoh, BMC-Thadlaskeiñ SSA ha ka jingïadonlang u L.S. Lyngdoh, Jt. Director DSEL West Jaiñtia Hills bad la ïoh ruh ka jingkren da u ma Richard B. Uriah, Principal North Liberty Higher Secondary School, Jowai bad kumjuh na ka Dr. L.M. Darnei, DMC, SSA West Jaiñtia Hills.
Napdeng ki lai tylli ki Block jong ka West Jaiñtia Hills ki skul kiba la jop ha kane ka jingïaid rally ki long ka Panaliar English School, Jowai, Q.C. Springside UPS SSA, Jowai, Panaliar Secondary School, Jowai wa ka North Liberty Hr. Secondary School, Jowai na ka Thadlaskeiñ Block.
Ka Muthlong Rim Govt. LPS, Madankhliehriat UPS SSA, Mowkaiaw, St. Dominic Secondary School bad ka Saw Lyngdoh Hr. Secondary School kila jop na ka Lakseiñ Block, katba na ka Amlarem Block ki skul ba jop ki long ka Amlari Model Govt. LPS, Trangblang Govt. UPS, J.N.M. Lamin Secondary School bad ka Laishnong Hr. Secondary School.
Na ka bynta ki skul kiba jop ha ka District Level ki long ka Panaliar English School, Jowai, Thadlaskeiñ Block, ka Madankhliehriat UPS SSA Mowkaiaw, Laskeiñ Block, ka St. Dominic Secondary School, Lakseiñ Block bad ka Laishnong Hr. Secondary School, Amlarem.