Shillong, Jylliew : Ka Block Development Office, Mawlai ka ba don ha Mawtawar hynne ka sngi Palei ka la sam 40 tylli ki Cheque kaba hap hapoh jong ka Farmer’s Collectivisation for Upscaling Production and Marketing Systems (FOCUS) programme bad 40 tylli ki sanction letter ne ki shithi ba la dep mang ïa ka pisa sha ki Self Help Group (SHG) naka bynta ka kam jong ki, kaba kot sha palat ka 62 lak tyngka.
Ïa kine ki cheque bad ki ram ba la mang la sam da u Bah PT Sawkmie, MLA ka Mawlai Konstitwensi kum u kongsan, bah Teiborlang Pathaw, MDC kum u symbud kongsan, BDO bah PT Passah, ha ka jingdon ryngkat ki rangbah shnong, ki dkhot jong ki SHG bad kiwei.
Haba ai jingkren kum u kongsan u Bah PT Sawkmie u la pyntip sha ki SHG ba don hapoh Mawlai ba un sa sam mar 5000 tyngka sha baroh kine ki SHG na ka bynta ka jingdonkam jong ki, khnang ba kin nanglah ban kyntiew ïa ka kam ba ki trei ne seng.
“Naduh bym pat long kane ka prokram, nga la dep pynbna ïa kane ka jingsam mar 5000 tyngka sha ki SHG, khnang ba kin lah ban pyntyllun ïa ki kam jong ki,” ong u Bah Sawkmie bad u la bynrap da kaba ai khublei ïa ka ophis u BDO kiba la pynlong ïa kane ka prokram kaba pynmyntoi ïa ki nongrep bad kiwei.
Nalor kata u la kyntu ruh ïa ki SHG ba kin long kiba trei shitom bad ban siew hok ïa ki ram ba ki shim bad ban shim ïa kane ka jingai ka sorkar mynta ka sngi kum u symbai bad BA kin nangpynheh ïa une symbai.
La pyniphuh iphieng ruh ïa kane ka sngi, wat hapdeng ka jingpynthud jong u slap da ki jingrwai bad jingak drama jong ki SHG.
Ha ka juh ka por la ïoh ruh ïa ka jingkren na u bah Teiborlang Pathaw, na ka Kong Evanisha Pathaw, na ka Kong Lajied Basaiamoit, na u Branch Manager ka Meghalaya Rural Bank bah F. O Nongkynrih bad kiwei.
