Nongpoh, Naitung, 18: Ka jingpyni paidbah ka Khasi Student Union, North Khasi Hills District Unit da ka Documentary Film ha ka lyngkhuh sngi ïap ba 190 snem u Tirot Sing Syiem, ka la ai mynsiem shisha ïa ki khynnah skul bad ki kmie ki kpa ba kin don ïa kata ka mynsiem ieit jaid bynriew, ha kaba katei ka phlim lyngkot ka KSU ka pyni ïa ka jingïaid lynti jong ka seng ba ka la shakri bad ïada ïa la ka ri bad jaid bynriew Khasi naduh ba la seng ïa ka ha u snem 1978.
Ïa kane ka jingrakhe ïa ka lyngkhuh sngi ïap u Tirot Sing Syiem la pynlong hynnin ka sngi ha Maitshaphrang L.P School, Jatlong, kaba dei kawei na ka skul ba la seng da ka KSU ban ai jingnang jingstad ïa ki paradoh ki parasnam ha ki shnong khappud ka Raid Nongtung (Block II) ha Ri Bhoi District.
Ka seng ha ka jingïalam u samla Ferdynalad Kharkamni kum u President ka KSU North Khasi District Unit bad u Samla James Hitler Mawphniang, General Secretary ryngkat kiwei kiwei ki nongïalam, ki la leh burom ruh ïa ka lyngkhuh sngi ïap u Tirot Sing Syiem ym tang ba la pyni ïa katei ka phlim lyngkot ka KSU bad ha kane ka sngi ka seng ka la aiti ruh ïa ki kor Computer sha ka Synjuk ki Rangbah Shnong Raid Nongtung bad ha kajuh ka por ka la sam ruh da ki jaiñsem sha ki kmie jong ki khynnah skul.
Lyngba jong kane ka sngi ba la kynmmaw burom ruh ïa u Tirot Singh Syiem kum u Syiem ba khraw ka jaid bynriew, ki nongïalam ka seng ki la bet ruh ïa ki symboh pyrkhat shaphang ka jingïaid lynti utei u syiem ba shlur ka jaid bynriew halor ka jingïakhun pyrshah jong u ïa ki Dohlieh ban lait na ka jingsynshar donbor bad ka jinglong mraw ha ki dohlieh na shiliang duriaw.
Ha kane ka sngi, katei ka phlim lyngkot ka KSU ka la ai mynsiem ruh naduh ki khynnah skul, ki nonghikai, ki kmie ki kpa ba ki don ïa kata ka mynsiem ieit jaid bynriew bad kum ki nongïalam kane ka seng ki la pynshlur ruh ba ngi dei ban long kita kiba don ka jingkitkhlieh ban ïada ïa la ka jong ka jaid bynriew kumba la ïalam da u Tirot Sing Syiem.
