Nongpoh, Nailur 29: Da ki spah ngut ki briew ba duna haki dkhot met kumjuh ruh ki riew tymmen kiba la kham noh ka rta kiba shem jingeh ban ïaid ban ieng, ban iohsngew bad duna ka bor iohi mynta ka sngi kila ioh pdiang da ki tiar jingïarap bapher bapher kum ki wheelchair, ki kali 3 shaka, ki tiar ïarap ban ioh sngew, ki dieng duh bad kiwei kiwei hadien ba ka Artificial Limbs Manufacturing Corporation of India (ALIMCO) mynta ka sngi kala sam ei ïa kitei ki tiar haka jingïalang kaba la long ha Umsning C&RD Block lyngba ka ophis u BDO, Umsning Block bad ka tnaad Social Welfare, Ri-Bhoi District.
Na Mawhati Constiteuncy kila don haduh 243 ngut ki riew tymmen bala palat 60 snem ka rta bad 26 ngut kiba don jingduna haki dkhot met kiba la ioh jingmyntoi ha katei ka sngi katba na Umsning constituency ki don haduh 360 ngut ki riew tymmen bad 48 ngut kiba duna haki dkhot met.
Ha katei ka sngi ka jingsam ïa kitei ki tiar ïarap, u Bah Charles Marngar MLA ka Mawhati Constituency u la shim bynta kum u kongsan haka jingdonlang u Bah Andrew Myrthong BDO ka Umsning C&RD Block, ka kong F Sun District Social Welfare Officer, ki nongmihkhmat naka ALIMCO lem bad kitei ki riew tymmen bad kiba duna dkhot met kum ki nongioh jingmyntoi ha katei ka sngi.
U Bah Charles Marngar MLA ka Mawhati haba kren ha katei ka sngi u ai ka jingïaroh ïaka ALIMCO lyngba ka sorkar pdeng kaba la shimkhia ban sam ei ïaki tiar ïarap ba bun jait katkum ka jingdonkam jong ki riew tymmen bad kiba duna haki dkhot met bad kane ka long shisha ka jingkyrkhu ïaki ban kyrshan bad ïarap ïaka jingeh kaba ki mad bad kynduh man ka sngi ka ban pynsting ruh ïaka jingeh jong ki.
