Jowai, Jymmang 10: U Myntri Rangbah ka sorkar jylla u Conrad K Sngama mynta ka sngi ula sam jingïarap pisa da ka Cheque sha ki kynhun treimon sngewbha naduh ki Self Help Group (SHG) bad ki Society bapher bapaher jong ka thaiñ Laskeiñ kiba don haduh 15 tylli baroh.
Kane ka jingïoh ïarap kitei ki kynhun lyngba ka tnad District Horticulture kin ïoh lad ban thied ïa ki tiar donkam jong ki na ka bynta ban seng ïa ki ‘Collective Marketing Center’ban pynmih khambun u Shynrai Lakadong.
La pynlong ïa kane prokram shi bynta na ka tamasa lehkmen ïa u Shynrai Lakadong ba la pynlong da ka ophis ka Directorate of Horticulture bad ka Meghalaya Basin Management Agency jong ka sorkar jylla kaba la sdang naduh hynnin ka sngi bad poi noh sha kaba kut mynta ka sngi ha madan Pamsna Laskeiñ Block West Jaiñtia Hills District.
Ha kane ka sngi u Myntri Rangbah ka sorkar jylla u Conrad K. Sangma ha ryngkat u MLA ka thiañ ma Nujorki Sungoh, u K. N Kumar IAS bala shongthai uba dei u Chairman ka Meghalaya Farmers’ Empowerment Commission, u Deputy Commissioner bah Garod L.S.N. Dykes, IAS, u Superintendent of Police u Bikram D. Marak, MPS. ki ophisar, ki nongrep nalor kiwe de kila poi sha kane ka tamasa.
La pynsngew da ki nongkren shaphang une u Shynrai Lakadong uba long uwei na ki mar ba bha tam bad uba la ïaid ïew bha mynta sha kylleng ka pyrthei bad lyngba ka jingdon jong ka Lakadong Mission kan dang ïarap shuh shuh ïa ki nongrep ban rep khambha ïa u.
Na ka liang u Conrad. K Sangma haba ai jingkren ha kane ka sngi ula pynsngew baka sorkar ka la pyrshang ban wanrah shibun ki lad jingïarap khamtam sha ki thaiñ nongkyndong ban pynkiew ïa ka rep ka riang haka liang ka ïoh ka kot hapoh ka jylla da kaba pyntreikam ïa kane ka Mission na ka bynta u Shynrai Lakadong.
Shuh shuh u kyrmen skhem ba ka jylla haka jingdap 60 snem kan sa long kawei na ki jylla kan kiew bha ha ka liang ka rep ka riang bad ka ïoh ka kot jong ka Ri kaba lah ban poi hapoh ka kyrdan ba shiphew (top 10), ka sorkar ka don ïa kane ka ka thong kaba hakhmat eh namar haduh mynta haduh 70 % ki dei kiba im ha ka rep.
Ula ong hadien 4 snem ka jingïaid lynti jong ka sorkar MDA la lah ban ïarap ha ka ban thew ïa ka jingbha jong une u mar shaduh Kolkata kala la shim por tang hapoh 10 minit lyngba ka juk stad mynta namar mynshwa ka la shim por haduh 10 sngi.
U Myntri ula ai ka jingïaroh ïa ki longkmie kane ka thaiñ kiba la don ïa ka mynsiem ban trei shitom ïa ka kam ha ryngkat ka jingïatrei lang bad ka sorkar, hadien kane u Myntri Rangbah ula ot ruh u Cake jong kane ka Tamasa ïa kaba ym pynkut shibit janmiet ha katei hi ka jaka. Kumjuh ruh la sam ïa ki khunsnam sha ki nongjop ha kane ka tamasa kiba la dep ban pynlong hynnin ka sngi.
