New Delhi Risaw 04: Ki kam thied mar jong ka India ki la sakhi ïa ka jingdie Navratri ba bun tam ha ki 10 snem tam, ba la wanrah da ki jingpynkylla Next Gen GST da ka Sorkar Modi kiba la pynduna ïa ki bai khajna bad kiba la plie lad ban ïoh shuh shuh ïa ki mar. Kine ki sienjam ki la pynduna ïa ki dor bad ki la plie lad ïa ki jingangnud jong ki nongthied mar, kaba la plie lad ïa ki longïing ba kin thied ïa ki kali ba kham bha, bei tyngka na ka bynta ki mar ha ki ïing jong ki, bad pynlut pisa da ka jingkylluid mynsiem na ka bynta ki mar, ha kaba la pynkylla ïa ka jingleh kmen sha ka jingthied mar bym pat ju sakhi mynno mynno ruh.
Kam die kali
Ka jingdie Navratri jong ka kompani shna kali Maruti Suzuki ka la kiew da 100%, kaba long ar shah ka jingkiew haba ïanujor bad u snem ba la dep bad kaba long ruh ka jingdie ba bun tam ha kine ki 10 snem ba la dep. Ka Maruti Suzuki ka la ong ba la don 150,000 tylli ki booking bad ba ka khmih lynti ban ïoh 200,000 tylli ki booking. Ka kompani ka la die 85,000 tylli ki kali ha u Navratri ba la dep.
Ka Maruti Suzuki ka la pynpoi ruh 1.65 lak tylli ki kali ha ki 8 sngi ba nyngkong jong ka Navratri. Ha ka sngi ba nyngkong jong ka Navratri, ka Maruti ka la pynpoi 30,000 tylli ki kali kaba long kaba bun tam, bad ka sngi kaba bun tam ka jingdie ha ki 35 snem.
Ka Mahindra & Mahindra, kaba die ïa ki SUV kiba ïaid ïew bha kum ka XUV700 bad Scorpio N, ka la sakhi ïa ka jingkiew ka jingdie da 60% haba ïanujor ïa uwei u snem bad uwei pat.
Ha Hyundai, ka jingdawa ïa ki kali kum ka Creta bad Venue ka la kyntiew ïa ka bynta jong ki SUV sha ka 72% jong baroh ki jingdie.
Ka jingleit sha ki jaka die thuk thuk jong ka Hero Moto Corp ka la kiew arshah ha kane ka Navratri ha kaba bun ki peit ïa ki thuk thuk shimet.
Ka Tata motors ka la die palat 50,000 tylli ki kali ha kane ka por jong ka jinglehkmen, ha kaba ki kali kiba ïaid ïew tam ki long ka Altroz, Punch, Nexon bad Tiago.
Ka Bajaj Auto ruh ka la bun bha ka jingdie ha ka Navratri.
Ka jingdie ba bun ïa ki mar elektrik
Ha kaba ïadei bad ki mar elektrik, ka LG, Haier, bad Godrej Appliances ki la sakhi ïa ka jingkiew ka jingdie ha kane ka Navratri haba ïanujor bad u snem ba la dep.
Ki jingdie jong ka Haier ki la kiew 85%, ha kaba la jan lut ki mar ba la buh na ka bynta ka Diwali haba ïadei bad ki 85-inch bad 100-inch TV kiba shongdor palat T 2.5 lak. Kane ka kompani ka la die ruh 300-350 tylli ki 65-inch TV man ka sngi ha kane ka por.
Ka jingdie ha ka Reliance Retail kaba long ka jaka die khutia ba heh tam ha India ruh ka la kiew da 20-25% haba ïanujor bad ka Navratri ha une u snem ba la dep ha kaba ka jingdie kaba bun tam ka dei ïa ki TV, smartphone bad ka riam.
Ka jaka die mar elektrik Vijay Sales ruh ka la sakhi ïa ka jingkiew 20% ka jingdie mar.
Ka LG Electronics India ruh ka la sakhi ïa ka “jingdie ba kiew bun shah” ha kane ka por jong ka Navratri.
Da kaba pynbeit ïa ki bai GST bad pynduna ïa ka jingbah khia ka jingsiew khajna na ka bynta ki mar kiba donkam bad ki mar ba ki briew ki angnud ban thied, ka Sorkar ka la wanrah ïa ka jinglong jingman ha kaba ki briew ki sngew shngaiñ ban pynlut pisa. Namar kane, ki brand bad ki nongdie khutia ki la sakhi ïa ka jingkiew ka jingdie kaba 25% haduh 100%, kaba long kaba ïarap bha ïa ka ïoh ka kot jong ka India kaba don nongrim ha ka jingdie mar. Kaba kham kongsan ka long ba ka bynta kaba nyngkong jong kane ka por lehkmen kaba mut ka Onam, Durga Puja, bad Dussehra ka jingthied mar ka long 40-45% na baroh ki jingthied mar ha kane ka por lehkmen kaba mut ba kane ka dei ka por ba bun tam ka jingthied mar ha ka ri.
