Nongstoiñ, K’lyngkot 03 : Ki kam pynroi kiba kongsan eh kum ka Polytechnic, ITI, District Jail ka District Library bad Auditorium, nangta ka jaka sumar khunlung bad longkmie ba armet lane ka Maternity and Child Hospital kiba don hapoh sor Nongstoiñ, ki la shu sahteng khlem pat urlong satia kawei ruh haduh mynta.
Napdeng kine ki kam pynroi, don lei lei kiba ka jingtei building ka la slem lane da ki bun phew snem, hynrei lyngngoh ba ka jingtreikam ka suki sha ba palat, kat haduh ba ka pynlong ïa kiba bun balang ki nongshong shnong ban shu sah ha ka lyngngoh.
Na ka liang ka West Khasi Students Union seng kmie na ka por sha ka por ka la pyrshang ban ïakynduh ïa ki heh sorkar jong ka District bad wat shaduh sha nongbah Shillong ban ïakynduh ïa ki minister ba dei peit tangba haduh mynta ym long kam satis.
Dang shen ruh ha u snem ba la dep, ka la leit ban ïakynduh bad pynkynmaw biang ïa u Deputy Commissioner jong ka West Khasi Hills ha kaba ïadei bad ki kam sahteng ha ka District, kynthup ïa ka Polytechnic, ITI, District Jail ka District Library bad Auditorium, ka MCH bad kiwei.
Ha kaba ïa dei bad kitei ki mat jingdawa, ka seng ka la pynkynmaw ïa u khlieh nongsynshar jong ka District ba un ïai buddien ïa kitei ki mat kiba sahteng la slem bah, kiba dei ki mat na ka bynta ki jingmyntoi jong ki paidbah khamtam ïa ki samla pule jong ka thaiñ.
Ha ka jingïakren bad u DC Nongstoiñ, u la pynpaw ba na ka liang jong u, u la shimkhia ban thoh sha ki bor ba halor ban pynstet bad pynurlong ïa kitei ki mat kiba long ka jingmyntoi u paidbah jong ka thaiñ. U la ong ruh na ka liang jong u, u khlem shong kli kti da kaba u la khot na ka por sha ka por ïa ki ophisar kiba dei peit ha ki tnad trei kam, ban peit ba ki mat ka roi ka par ha la ki jong ki tnad treikam, ba kim dei ban sahteng hynrei ki dei ban trei kam shait shait.
Na ka liang ka seng lyngba u bah D.Sun President ka seng, u la pynpaw ba shen mar syn sdang u snem 2026, kan sa buddien biang ïa kitei ki mat jingdawa ym tang na u DC jong ka thaiñ. Hynrei kan sa rah haduh ki bor ba halor jong ki tnad ba ha khlieh duh jong ka jylla, khnang ba kin lah ban pynbiang ne mang ban pynurlong khlem ki jingpynsah teng ïa ka roi ka par sha ka thaiñ West Khasi Hills.
