Sahteng ka surok ha View Point lah bun snem, kyrpad u MDC ïa ka Hima Mylliem ban ai NOC noh

Shillong, Risaw 10: U MDC ka Laban Mawprem u Bah Ricky Shullai ha ka sngi Thohdieng u la lum ka jingïalang bad ka jingjurip ban buddien ïa ka surok kaba 5 spah haduh 6 spah mitar kaba na Shillong Peak ka ban poi sha View Point kaba itynnad bha bad kaba la sahteng naduh ka snem 2018 haduh mynta.
Ha ka jingïalang u MDC u la ïathuh ba kane ka surok ka hab hapoh ka jingpeit ha Hima Mylliem, bad kumjuh hapoh ka Riat Laban Dorbar Pyllun.
Ha ka jingïalang la donlang u Myntri Sohtun, Myntri Kharkongor, bad kiwei na ka Hima Mylliem, na ka liang ki ophisar KHADC, bad ki Nongïalam Shnong kiba hab hapoh ka Riat Laban Dorbar Pyllun.
U MDC ha ka jingïalang u la pynpaw ka jingangnud ba kane ka surok kan urlong noh tang mar ïa ïoh NOC na Hima Mylliem ba kan phah ka KHADC ban ïoh ka jingmynjur.
U la ïathuh ba ka Sorkar ha u snem 2018 ka Sorkar ka la dep mang T. 2 klur ban shna surok hynrei ka la mih noh ka jingeh hangne hangtai bad ka la sahteng noh ka kam.
U la ïathuh ruh ba ha u snem 2022 la pynlong ka jingïalang kaba heh haba la donlang ruh u Paiem Ainam Manik Syiem ka Hima Mylliem bad kiwei, bad la mynjur ban ai noh ka NOC hynrei haduh mynta khlem pat urlong, kumta u la kyrpad ïa baroh kiba don bynta lang ban ïatreilang, kyrpang eh na ka Hima Mylliem, ban pynsted ai NOC khnang ban pynïaid shakhmat ïa ka kam.
U la ïathuh ba kane ka surok, kaba la mynjur ruh da ka tnat Forest kan long ka jingkyrkhu ïa baroh, khamtam ka kam khaïi ki samla Khasi, ki kam jngohkai bad ki paidbah kiba kwah leit sha View Point bad ki jaka ban buh ïa ki rope way bad kumjuh shaduh Laitkor, bad na ka liang jong u un buddien haduh ban da urlong kane ka jingthmu babha ka ban ai jingmyntoi lang ïa baroh.
La ïoh ka jingkren na u Myntri hima Mylliem Myntri Sohtun, na u nongïalam ka Riat Laban Dorbar Pyllun Bah Ïostar Sun bad kiwei.
U MDC ka Laban-Mawprem u Bah Ricky Shullai ha ka jingleit jurip ïa ka surok kaba hab hapoh ka Raid Mylliem na Shillong Peak kaba jrong kumba 6 spah mitar, u la ïathuh ba ka jingsah teng lah bun snem ban shna noh ïa kane ka surok kadei na ka jingthud naba mynshwa ki la khot da ka Raid Laban Dorbar Pyllun hynrei ha ka jingshisha ym lah ban ai da ka Raid namar kane ka surok ka dang hab hapoh ka jingkhmih ka Raid Mylliem, bad ka jingthud hi kadei ka kyrteng.
U la ïathuh ruh ba hadien ba la ïasyllok lang baroh kiba don bynta la poi sha ka rai ban pynkylla noh na ka Raid Laban sha ka Riat Laban Dorbar Pyllun khnang ban ïoh NOC ban shna ïa ka surok bad hadien ba la mynjur ban ai NOC na ka Hima Mylliem ka mih biang ka jingthud ha kaba ha u snem 2022 kaba soi ïa ka jingmynjur na ka bynta ka project rope way ka Sorkar bad ka Riat Laban Dorbar Pyllun ki la ïaid lait ïa ka Hima Mylliem bad ka KHADC.
Kumta kum u MDC u la lum ka jingïalang jong baroh halor kane ka kam ban pynurlong noh ïa kane ka kam ba sahteng kaba la mang pisa naduh u snem 2018 bad ba la ïoh ka clearance na ka Sorkar bad ka tnat Forest.
U la pyntip ruh ba shisien ba la ïoh ban shna ïa kane ka surok kan long ka jingkyrkhu ïa ki nongshong shnong ka jylla khamtam kito kiba kwah ban leit sha Laitkor, sha Nongthymmai bad kiwei ki jaka, naba kane ka surok kan pynlait ruh na ka jingdheng kali bad kan long ruh kum ka link road ban pynïasoh sha kiwei ki jaka, nalor ka jingleit sha Shillong Peak View Point.