Tura, Jymmang, 11: Ka jingshna ïa ka Civil Hospital ba shispah jingthiah ha Resubelpara, North Garo Hills District ka la shu sahteng mynta la shi snem kynthih na ka daw ka jingbym pyllait pisa ka Sorkar sha u Kontraktor uba pyntrei ïa kane ka Hospital.
Ha ka dorkhas ba la phah sha u Myntri Rangbah ka Jylla u Conrad Sangma u MDC jong ka Rongrong Constituency u Rinaldo K. Sangma u la ong, “ha ka kyrteng jong ki nongshong shnong ka Resubelpara bad ka Rongrong nga pyntip sha phi halor ka jingsahdien jong ka koit ka khiah ha ka thaiñ.”
“Ngi don tang kawei ka Community Health Centre kaba ai jingshakri ïa baroh ki paidbah jong ka Resubelpara bad ïa ki shnong kiba marjan haba ki pang ki shitom. Ka long kaei kaei kaba sngewpangnud ban pyntip ïa phi ba tang ki jingjia aksiden kiba rit baria bad ban pynkha khun ruh ym shym la lah satia ban sumar ha kane ka jaka ai jingsumar bad ha kiba bun ki khep la shu phah beit sha Tura lane sha Goalpara, Assam haba don kino kino ki jingjia na ka daw ka jingbym don ïa ki lad jingsumar kiba biang bad khamtam ïa ki doktor kiba tbit,” ong ka dorkhas jong une u MDC sha u Conrad Sangma.
“Wat ki longkmie ba armet la bun sien ki hap ban leit sha Goalpara lane wat shaduh Guwahati tang ban leh test , kiba don jingpang ha ka por ba dang kha bun, kiba la dei ban kha khunlung bad ïa ki paidbah kiba shu pang malu mala na ka daw ka jingbym biang ki lad jingsumar,” u la ong.
“La dei ban pyndep noh mardor ban shna ïa ka Hospital kaba 100 jingthiah jong ka Civil Hospital khnang ban weng ïa ka jingeh jong ki paidbah khamtam ïa ki paidbah kiba sah sha ki thaiñ nongkyndong kiba wan na ki longing kiba duk bad kiba duna ka ïoh ka kot,” u la bynrap.
Katkum ka jingpyntip jong une u MDC, ka jingshna ïa kane ka Civil Hospital kaba 100 jingthiah ha Chidret, Resubelpara, ka la sahteng naduh u snem baladep. Ka jingtrei ka la sdang naduh u Lber, 2019 ka la sahteng na ka daw ka jingbym pyllait pisa.
“Ynda haba la tohkit la lap ba ym pat shym pyllait pisa satia wat shi naïa ruh sha u Kontraktor kaba pynlong haduh u pud ba u Kontraktor un hap ban pynsangeh ïa ka jingtrei,” ong une u MDC ka Rongrong.
“Na ka bynta ka bit ka biang jong ki paidbah nongshong shnong ka rilum Garo, nga kyrpang ïa phi ban pyllait noh kham kloi ïa ka pisa khnang ban ïoh sdang biang ïa ka jingtrei bad ba ka jingshna ïa ka hospital yn dup lah ban pyndep ha ka por kaba biang,” la kyntu une u MDC ïa u Myntri Rangbah.
