Nongstoiñ, Naitung , 29: Ka jingdon jong ki surok na Nongstoiñ sha Umyiap, Nongrangoi kaba ïaid lyngba ïa ka shnong Mawkawah bad Khliehmawlieh ka long ka jingkyrkhu kaba khraw ïa ki nongleit nongwan bad ka kit ka bah bad kiwei ki jingdon kam.
Kane ka surok ka dei kaba pynïasoh bad kawei pat ka surok kaba ïaid na ka shnong Ksehkohlong sha Mawkynbat lyngba ka shnong Mawïawet hynrei la bun phew snem ym pat lah satia ban pynïasoh watla ka bynta kaba sah ka don sa tang kumba phra spah haduh khyndai spah mitar.
Ka daw bym pat lah ban pynïasoh ïa ka surok ka dei namar ka jingdon jong ki pynthor kba bad ki trai pynthor kba ruh kim sngewthuh satia ba ka surok ka long kaba donkam bad kim shah satia ba ka surok kan ïaid lyngba ki pynthor kba jong ki.
Watla katta ruh kumba katto katne snem ba mynshuwa ha ka por ba u Bah Yesparly Wahlang u dang long u Sordar jong ka shnong Lumpyngad kaba don ha syndah bad ka pyntha Umyiap u la trei shitom katba lah ban pynsgewthuh ïa ki trai jong ki pynthor kba ba kin shah ban shna lynti ïaid kjat lyngba kitei ki pynthor kba shaduh Madan Rïewblei lyngba ka skhim shispah sngi (MGNREGS) ha kaba u la ïohlad ban shna ïa katei ka lynti ïaid kjat kaba la long ruh ban ïaid ki kali rit na shliang sha shiliang namar la siang da ka dewbilat.
Haba phai ha ka jingbym ai jaka jong ki trai pynthor kba ban shna ïa ka surok kaba biang ban pynïasoh na Mawkynbar sha Nongrangoi ka la buh jingeh bha namarba ha u snem 2027 ka Jingïaseng Samla jong ka KJP Synod Sepngi kan long ha ka Balang Presbyterian Umyiap hynrei ha kaba ïadei bad ka jingshna ïa ka surok kaba biang kaba pynïasoh na Mawkynbat sha Nongrangoi na ka liang ki nongïalam bad ki dkhot jong ka Komiti pynkhreh Synod jong ka Balang Presbyterian Umyiap ki dang pyrshang ban ïakren sngewthuh jingmut bad kyrpad ïa ki trai pynthor ba kin pyrkhat lem na ka bynta ka jingwan jong ka Jingïaseng Samla KJP Synod Sepngi khnang ba kan pynsuk ïa ki paitbah kiba wan sha ka jingïaseng. Nalor kata lada la lah ban pynïasoh ïa ka surok kan pynsuk shibun ïa ki nongwan jingïaseng ka Madan Rïewblei ka la dei lypa kawei na ki jaka pynïeng kali ba ka Balang ka ladep pynbeit.
Ha kajuh ka por na ka liang jong ka Balang Presbyterian Umyiap ka la kyrpad jur ïa ki trai pynthor ba kin pyrkhat lem na ka bynta ka jingbha ha baroh ki liang.
