Mawkyrwat, Risaw 08: Ka long ka jingkyrkhu shikatdei eh ïa ki paitbah jong ka South West Khasi Hills District lada ngi phai sha ka Civil Hospital Mawkyrwat kaba mynta ka la trei kam bha khamtam ki Doctor bad ki Nurses ki la trei shitom watla ki dang duna ki tiar ki tar khamtam ban puid ïa ki nongpang.
Katkum ka khubor ba la ïoh lum napoh ka Civil Hospital la ong ba shibun ki jingpang kiba jur la sumar bad kiba hap ban puid la lah ban puid ha kane hi ka jaka sumar bad katkum ka jingïathuh jong u Surgery Junior Specialist u Dr. Daniel Suting ka don kawei ka jingjia kaba kham phylla kaba dang shu dep shen ban sumar ha kaba uwei u rangbah na ka shnong Jakrem, South West Khasi Hills District u la kum nguid ïa ka shyieng dohkha kaba heh ha ka por ba u dang bam ja bad ka shyieng u la sahkut noh ha u tangnguid.
U Dr. Suting u la ong kane ka dei ka Case kaba dang thymmai ka bym pat ju lap koit bad ka dei ruh ka sien kaba nyngkong ba la sumar ha ka Civil Hospital Mawkyrwat bad ha ka jingsumar jong ki doktor ryngkat bad ki Nurse ka la long ka jingsumar kaba jop bad ïoh ban sei ïa ka shyieng uba la sahkut.
U samla Golddenstar Kharsyiemiong, 29 snem ka rta uba dei u nongpang u la ïathuh bane ka la jia naduh ka sngi Thohdieng jong ka taiew baladep ha kaba u la kum ïoh nguid ïa ka shyieng dohkha (kaba dei ka shyieng na bynta jong ka khlieh dohkha) ha ka por ba u leit khwai doh ha Wah Ranikor.
“Nga la pyrshang ban leit phah sumar hapoh CHC Ranikor hynrei kim lah bad ki la ai jingmut ïa nga ban leit sha ki jaka sumar ba kham biang,” u la ong bad ïathuh ba u la leit wad jingsumar ha Civil Hospital Mawkyrwat ha kaba la lah ban sei ïa ka shyieng dohkha kaba heh ba ar inshi ha ka sngi Baar.
Une u samla u la pynpaw ka jingsngewnguh ïa ka jingtrei shitom jong ki Doktor kumjuh ruh ïa ka Civil Hospital Mawkyrwat baroh kawei ha kaba u la kyntu ruh ïa kiwei ki nongpang ba kim dei ban buh ka jingartatien ban leit wad sumar ha kane ka jaka sumar kaba don hajan tam namarba ka la long kaba paka ban ai jingsumar ïa ki paidbah khamtam ha ka jingpang kaba u la ïa kynduh.
