Nongstoiñ, Nailar 31: Ha kine ki bnai ba la dep ka Kompeni mobile phone ka la ai jingtrei ïa uwei u Kontraktor ba un pynïeng ïa u tower mobile phone ha ka shnong Ktiehthawïar, kaba hap ha ka Mawshynrut C&RD Block, kaba dei ruh ka shnong kaba ïajan bha bad ki shnong khappud kiba don ha ka thaiñ Langpih. Hynrei hadien ba u la sdang ban pyntrei, ki la don ki nongshong shnong kiba la pyrshah bad pynthut ïa katei ka jingtrei, kat haduh ba u la hap ban pynsageh shuwa.
U bah B.Kharsyiemlieh sordar jong ka shnong Langja kaba don ha katei ka thaiñ, u la ïathuh ba kitei ki nongshong shnong kiba pynthut bad pyrshah ban pynïeng ïa utei u tower ha katei ka shnong, ki dei kiba ju mlien na ka por sha ka por ban pynthut ïa ka imlang sahlang ha ka thaiñ bad ki ba ju pynthut bad tuklar katba wan ki kam pynroi na ka sorkar, namar ba ki kwah ban kam trai ïa ka thaiñ baroh kawei.
U bah T.Lyngdoh uwei na ki riew tymmen u la ong ba ka la don ka jingïaleh mokutduma palat hynriew phew snem hapdeng ka kynhun jong kitei ki briew kiba pynsangeh ïa ka jingpynïeng ïa utei u tower mobile ryngkat ki paitbah shnong. Ha kine ki snem ba la dep ki nongsynshar shnong naduh Ktiehthawïar, Langja, Khyllemsarin, Umthlu, bad Mawri, ki la ïashong pyrkhat halor katei ka jingïaleh mokotduma para nongshong shnong, ban thaw ki lad ki lynti kumno ban wanrah ïa ka jingïasngewthuh jingmut bad ban pynkut noh ïa katei ka jingïaleh markynti para nongshong shnong.
U la ong ruh ba ha katei ka jingïakynduh lang jong ki nongsynshar shnong da kawei ka sur ki la ïakut ba baroh ki nongsynshar shnong, ki seng samla shnong bad ki paitbah kin ïatreilang ban pynurlong ïa katei ka jingthmu. Hynrei ki nongïalam ba hakhmat jong kitei ki briew kiba ju ïaleh pyrshah ïa ki paitbah, wat la ki don tang khyndiat ngut ruh ki dang ïa pyneh bad pyrshah ïa katei ka jingthmu kaba bha jong ki nongsynshar shnong.
U la ong ruh ba ha ka jingshisha lada la dep tei ïa utei u tower ha Ktiehthawïar bad la pyntreikam, ka la long ka jingmyntoi kaba khraw ïa ki paitbah khmtam eh ïa ki shnong khappud, namar lada don kino kino ki jingjia kum ki jingïaklumar ne ka jingshah thombor ha ki briew ka sorkar Assam, ki lah ban pyntip kloi ha ki bor sorkar ha kajuh ka por, namar utei u tower u lah ban treikam ha ka thaiñ baroh kawei.
U la ong ruh ba da ki phew tylli ki shnong ha katei ka thaiñ haduh mynta, kim pat don network mobile phone satia. Lada jia ki kam ba ki kynthei khynnah ki shah thombor ha ki riew shim kabu ruh, ka shim por slem kat haduh ban da pyntip ha ki bor ka aiñ ba kin leh ïa kaba donkam.
