Nongstoiñ, K’lyngkot, 9: U Bah Marbiang Nongsiej na Nongstoiñ u ba la shah pynduh tiket noh tang shiteng por, u la pynpaw ka jingsah umdum balei u shah weng noh ka tiket na ka party VPP tang khyndiat por, watla na ka liang jong u ha ka jingshisha u la pynkhreh ban ïakhun ïa ka elekshon MDC ka ban sa long shen na kane ka party.
Ha u kyrwoh khubor ba la pyllait ha ka sngi Palei u la ong, “kum uwei na ki nongshong shnong jong ka Nongstoiñ Constituency, uba don ka mynsiem ban shakri ïa ki paitbah lyngba i bor i barit eh hadien ba la mih kane ka seng VPP, nga la pynïasoh bad ka halor ka jingïohi ba ki don ki nongrim kiba biang”.
“Hadien ba nga la pynïasoh nga la ïa trei ryngkat ryngkat bad ka party bad nga la aplai ïa ka tiket MDC naduh u bnai November 2023, namar ka party ruh ka nang pyrkhat ka election kan long ha u 2024 hynrei la pynjlan noh. Kumta ka ïaid ka por bad ha ka MP election ruh ki nongïalam Party VPP na Nongstoiñ, ki la bynshet ïa nga ïa ki kam kiba khia bad nga la trei shitom hi ruh ha kato ka election MP bad nga ngeit ba u Organising Secretary jong ka Nongstoiñ ruh u kubur ïa kata”.
“Ha ka 11 tarik Naiwieng 2024 na ka liang ka State Election Committee ka la phah wan ïa nga bad ïa ki para nong aplai tiket ha office party ha Laitkor. Ha katei ka sngi ha ka por 4.30 janmiet la pynbna ïa ka kyrteng jong nga ba nga dei u candidate jong ka Nongstoiñ constituency”.
“Hadien shi sngi ka jingpynbna ticket nga la phone ïa u President Rangbah jong ka party bad nga da kylli ruh ïa u lah long ne em ba ngan leit pynithuh ïalade ha ki lok ki jor ki shnong ki thwaw ba nga la ïoh tiket. U la jubab hooid ka long. Kumta nga la ïaid kylleng ka Nongstoiñ Constituency bad ha ka 2 tarik Nohprah 2024 u President Rangbah u la phah wan ïa nga na bynta ka Orientation Program ha ophis jong ka Party”.
U Bah Marbiang u la ong, “kaba pynlyngngoh ka long ba haduh kane ka sngi ba mynta na ka liang ka SEC, ka khlem khot ïa nga ban ïa kren ei ei shaphang kata ka kam tiket ba lah dep ai ïa nga. Lada don ki daw ka lah dei ban khot markhmat ban kylli shaphang kita ki daw. Hynrei em bad wat haduh ban da pynmih ïa ka ka jingpynbna ha ka 7 tarik Kyllalyngkot 2025 nga shu ïohi lyngba ki lad pathai khubor ba ai noh sha uwei ïa ka tiket bad la weng ïa nga. Ki khlem pyntip eiei la ka long da ka telephone ne ka jingthoh”.
“Kaba buh ïa nga ha ka umdum mynta ka long halor kato ka jingjia ïa ka North Shillong. U Spoke person u la kren shai ha u kyrwoh sha ki lad pathai khubor ba yn ym lah shuh ban pynkylla ïa ki kyrtong, namarba baroh ki kyrtong ladep bishar bha bad ïa ngi la pynkup bor da ka riti treikam jong ka party bad ka rai jong ka party ka dei ka rai ba halor duh. Na ka liang jong nga, ngam sngewthuh shuh mano shuh kita ki bor ba kham halor shuh shuh ne kiba kham hapoh kiba la shim biang ïa ka tiket kaba la dep pynbna paitbah”, u la ong.
“Halor kino ki daw ba ki la weng ïa nga ngam don jingtip ei ei namar ka SEC ka khlem khot ïa nga ban ïa kren ne ka khlem ai kano kano ka jingkhot hajir, hynrei la shu weng beit kumto. Ka jingkylli ka long ba lada kim ibit ïa nga balei ki ai naduh ba sdang. Lada kim ai naba sdang ngam lei lei, hynrei nga shim ba kane ka jingleh ïa nga ka dei ka jingpynkheiñ wat ïa ka hok longbriew manbriew bad nga pyrkhat ba wat ka mynsiem ïatip lem ruh ka lah ïap”, ong ka kyrwoh na u Bah Marbiang Nongsiej.
