Nongstoiñ, Lber 11: Naduh ba u Conrad Kongal Sangma Myntri Rangbh ka jylla u la wan ban plie ïa ka Rambrai C&RD Block ha ka 9 tarik Naiwieng 2022, ki paitbah ka thaiñ ki la dap da ka jingsngewkmen, namar ki da kyrmen skhem ba ïa baroh ki kam sorkar kiba kiba dei ban pyntrei lyngba ka Block Ophis, kim donkam shuh ban pynlut por ban leit haduh Nongstoiñ, namar ba ka Block ophis ka la don ha Rambrai.
Phewse la palat ar snem tam haduh mynta u Block Development Officer ba pura um pat don, hynrei dang hap ban peit da ki ophisar MCS na Nongstoiñ. Kumta ka la buh jingeh haduh katta katta ïa ki paitbah ka thaiñ.
Na ka liang ki nongïalam ka FKJGP Rambrai circle hadien ba ki paitbah ki la ud ki la nam na ka por sha ka por, ki la pan jingshai lyngba ka Right to Information Act 2005 na u Block Development Officer ka Nongstoiñ, u ba dei ruh ha kajuh ka por kum u Public Information Officer bad lyngba ka jingwad jingtip, ki la ïoh pdiang ïa ka jubab kaba biang kaba la pyni shai ba katei ka Block kam pat don ïa u BDO ba pura u ban peit ïa katei ka Block.
Nalorkata katkum ki jingtip ba ka seng ka la ïoh pdiang lyngba ki kot ki sla, ki pyni ba ka sorkar ka la dep thung kumba khat ar ngut ki nongtrei ki ban peit ïa ki kam pynroi jong ka sorkar kiba dei ban pyntrei lyngba ka Block Office, kum ka jingpyntrei ïa ka skhim shispah sngi (MNREGA) bad ka skhim PMAY G.
Kitei ki khat ar ngut ki nongtrei kiba ka sorkar ka la thung na ka byta ban peit ïa ki hynriew tylli ki G.S circle ka Kyrshai, Mawdoh, Mawlieh, Mawthir, Mawdet bad Rambrai ki don hynriew ngut ki Data operator bad hynriew ngut ki Technical Assistant.
Halor katei ka jingud jingnam jong ki paitbah, ki nongïalam ka seng mynta ka sngi hat majai ka 12 tarik Lber ki la leit ban jurip ïa katei ka Block ophis. Hynrei ki la lap ba ym don nongtrei wat tang uwei ruh bad wat ka signboard jong ka Block ruh kam don satia lait tang u maw kyrteng ba la buh ha ka por ba la wan ban plie ïa katei ka ophis.
U bah Jiedstarland Lyngkhoi president ka FKJGP Rambrai circle haba ïakren bad ki nongthoh khubor ha ohis treikam ka seng, hadien ba ki la wanphai na ka jingleit jurip, u la pynpaw ïa ka jingsngewkhia halor ka jingpynsahteng jong ka sorkar ban tei da ka ophis ba pura jong ka Block.
U la pynpaw ruh ïa ka jingsngewdiaw ïa ka jingbym don u BDO ba pura bad ka jingbym shimkhia jong ki nongtrei kiba ka sorkar ka la dep thung ïa ka kam kaba la bynshet ha ki. Namar ka jingujor ki paitbah sha ki nongïalam ka seng ki la ong ba ki don ki nongtrei kiba wan tang shisien shitaïew kata tang ha ka sngi ïew Rambrai.
U la ong ruh ba ka jingwan jong kitei ki nongtrei tang shisien ha ka shi taïew ka buh jingeh ïa ki paitbah lada ki don kam kyrkieh ha ki sngi ki bym dei sngi ïew.
Ha kajuh ka por u la kyntu ïa ka sorkar ba ka dei ban pyntreikam pura noh kloi ïa katei ka Block, namar ka jingdon jong ki nongtrei ha Block Ophis, ka pynjan ïa ka jingïadei jong ki paitbah bad ka sorkar ym tang ha ki kam pynroi bad lad ai jingïarap. Hynrei kaba kongsan eh ka dei ha ka shongsuk shong saiñ, ka bha ka miat, ka imlang sahlang bad kiwei kiwei ki bynta kum ka jingïaleh pyrshah ïa ki kam sniew ba bun jait.
Haba pyrshang ban twad jingmut na ki paitbah nongshong shnong katei ka thaiñ, ki la ong ba katkum ka jingtip ki la don art ylli ki jaka kiba ki bor sorkar ki la phah ïa ki briew jong ka ban leit sorjamin na ka bynta ban tei ïa ka Block ophis. Hynrei haduh mynta kim pat ïoh jingshai satia ha kano ka jaka ka sorkar kan tei ïa ka Block ophis.
