Shillong Risaw 23: Ka Executive Committee hapoh ka jingïalam ka VPP ha KHADC ka la ïathuh ba ka jaka jngohkai kaba don ha Mawlong ka la jan dep pura bad mynta ka sah satang kumba 3%.
Ïa kane la ïathuh da u EM ba khmih ïa ka Council Asset u Bah Pynkhrawboklin Kharjahrin u la ïathuh ba ka jingtrei haba ïadei bad ka Wah-u-tim view point ka la poi 97% bad kaba sah ka long sa tang 3% bad ynda la plie ïa kane ka jaka yn sa lah ban pyndep pura ïa baroh ki jingtei ha kane ka jaka.
Ïa kane u la jubab ïa ka jingkylli ba la wanrah da u MDC ka Shella u Bah B Synrem halor kane ka view point. U EM u la ïathuh ruh ba ka 3% kaba dangsah ban pyndep kadei satang ban shna ki jaka ïalehkai ki khyllung khynnah, ka jingpynitynnad bad ki jingpynphuh pynphieng.
U EM u la pyntip ruh ba ïa kane ka jaka jngohkai la dep ban aiti sha ka Hima Mawlong bad ka shong sa ha ka Hima ban pyndep ïa kiba dangsah.
Halor kane u EM, kumba la pynpaw u MDC ba kane ka jaka kan kyntiew ïa ka ïoh ka kot bad aikam aijam, u la pyntip ba ka Council ka la dep mang T. 2 klur ïa kane ka project hynrei la katto katne snem la shu ieh kumto bad bun na ki jingtei ki la jot, kumta mar sien shimti ïa kane ka EC mynta la lah ban pyndep bad ban aiti noh ïa kane ka project sha kane ka Hima.
