Sah hi ka trai jaka ha ka ïing Sub-Centre ha Mawmuthoh, khot ïakren u MLA ïa ki Ophisar

Shillong, Jylliew 24: Ka Kong Siyoda Kharmudai na ka shnong Mawmuthoh kaba la ai jaka sha ka tnad ka koit ka khiah ha u snem 2009 na ka bynta ban shna ïa ka Sub Centre ha katei ka shnong ka la leit shong leit sah hi noh dalade hi ha katei ka Centre namar ka jingbym pat ïoh jong ka ïa ka hok ba la ïateh kular bad kumjuh ka jingbym pyntrei kam ïa kane ka jaka ai jingsumar.
La ai jaka ban shna ïa kane ka ïing Sub Centre, kaba la pyndep ha u snem 2011, halor ka jingïateh bad ka tnad ka koit ka khiah ba ka dei ban pynrung iwei i dkhot na ka longïing ban ïoh kam ha ka tnad. Ki snem ki la tyllun hynrei katei ka longkmie kam pat ïoh ïa ka hok na katei ka jingïateh kular.
Sa kawei ruh ka tnad naduh ba la dep shna ïa ka Centre kam pat wan ban pyndonkam ban ai jingshakri sha ki nongshong shnong ha ka liang ka jingai jingsumar. Ka la kynnoh ba ka dei ka jingleh sting ka tnad ka koit ka khiah ka Sorkar Jylla bad mynta ka la buh por ar bnai kata haduh ba kut u Nailar, 2022 ban pyndep ïa ki kam kiba sah bad ka bad kumjuh ban plie ïa katei ka Centre.
Halor kane, u Bah Lambor Malngiang, MLA ka Nongkrem u la khot ïa ki ophisar ka tnad ka koit ka khiah ha khmat katei ka Sub Centre ban ïakren da kaba shai ïa ki jyrwit jyrwat baroh kiba lam sha ka jingslem ban pyntreikam ïa kane ka Centre.
Na ka liang u Bah Lambor hadien ka jingïamir jingmut lang bad ka trai jaka lem ki ophisar ka tnad ka koit ka khiah kumjuh ki nongïalam shnong, u la ong ba la kumno kumno yn plie noh ïa kane ka Centre ha shwa ban kut u Nailar, 2022 bad kyntu ïa ki bor ba dei peit ïa ka tnad ban pynbeit kloi katba lah ïa kitei ki bynta kiba pynslem ban ïoh plie ïa ka Centre.